ന്യൂദല്ഹി: പ്രളയത്തില് ദുരിതമനുഭവിക്കുന്ന വയനാട്ടിലെ ജനങ്ങളെ ഓര്ക്കുന്നെന്നും അവര്ക്ക് വേണ്ടി പ്രാര്ഥിക്കുന്നെന്നും വയനാട് എംപി രാഹുല് ഗാന്ധി. വയനാട്ടിലേക്ക് വരാന് ഒരുങ്ങിയതാണ് പക്ഷേ, ഇപ്പോള് എന്റെ സാന്നിധ്യം രക്ഷാപ്രവര്ത്തനത്തിന് തടസ്സമാകുമെന്ന് ഉദ്യോഗസ്ഥര് പറയുന്നു. അവരുടെ അനുമതിക്കായി കാത്തിരിക്കുകയാണ് താനെന്നും രാഹുല് ട്വീറ്റ് ചെയ്തു.
മുഖ്യമന്ത്രി പിണറായി വിജയനുമായി വയനാട്ടിലെ സ്ഥിതി ചോദിച്ചറിഞ്ഞു. വയനാട്ടിലെ പ്രശ്നങ്ങള് മുഖ്യമന്ത്രിയെ അറിയിച്ചിട്ടുണ്ട്. വയനാട്, കോഴിക്കോട്, മലപ്പുറം കളക്ടര്മാരോടും സംസാരിച്ചു. എന്തെല്ലാം പ്രളയദുരന്ത നിവാരണ പരിപാടികളാണ് ചെയ്യുന്നതെന്ന് ആരാഞ്ഞിട്ടുണ്ടെന്നും രാഹുല് പറഞ്ഞു.
പ്രളയ ദുരന്തം ലഘൂകരിക്കാനുള്ള പ്രവര്ത്തനങ്ങള്ക്ക് ഇറങ്ങാന് കോണ്ഗ്രസ് പ്രവര്ത്തകരോട് അഭ്യര്ഥിച്ചിട്ടുണ്ടെന്നും രാഹുല് ട്വീറ്റ് ചെയ്തിട്ടുണ്ട്.
അമേത്തിയയിലെ ജനങ്ങളോട് സമീപിച്ചിരുന്ന രീതി തന്നെയാണ് വയനാടിലും രാഹുല് തുടര്ന്ന് പോരുന്നത്. കഴിഞ്ഞ ലോക്സഭ തെരഞ്ഞെടുപ്പില് ഇതിന്റെ പ്രത്യാഘാതം രാഹുല് അനുഭവിച്ചിരുന്നു. എന്നിട്ടും പാഠം പഠിക്കാതെ രാഹുല് അതേ സമീപനം വയനാട്ടിലെ ജനങ്ങളോടും തുടരുകയാണ്.
ഓഗസ്റ്റ് എട്ട്, ഒമ്പത് തീയതികളില് കനത്ത മഴയാണ് വയനാട് പ്രതീക്ഷിക്കുന്നത്. കേന്ദ്ര കാലാവസ്ഥ നിരീക്ഷണ വകുപ്പ് ജില്ലയില് രണ്ട് ദിവസവും റെഡ് അലേര്ട്ട് ആണ് പ്രഖ്യാപിച്ചിട്ടുള്ളത്. അതിതീവ്രമായ മഴയാണ് ഇവിടെ പെയ്യാന് സാധ്യതയുള്ളത്.
സംസ്ഥാനത്ത് കനത്ത മഴയാണ് രണ്ടുദിവസമായി പെയ്യുന്നത്. വിവിധ ജില്ലകളിലായി അഞ്ച് പേര് ഇതുവരെ കാലവര്ഷക്കെടുതിയില് മരിച്ചിട്ടുണ്ട്. ഇടുക്കിയില് ഒരു വയസ്സുകാരി ഇന്ന് ഉച്ചയോടെ മണ്ണിടിച്ചിലില് മരിച്ചിരുന്നു.
എല്ലാ താലൂക്കുകളിലും 24 മണിക്കൂര് പ്രവര്ത്തിക്കുന്ന കണ്ട്രോള് റൂമുകള് തുറന്നിട്ടുണ്ട്. അടിയന്തര സാഹചര്യങ്ങളില് ബന്ധപ്പെടാനായി 1077 എന്ന എമര്ജന്സി നമ്പര് തുടങ്ങിയതായി സംസ്ഥാന ദുരന്ത നിവാരണ അതോരിറ്റി അറിയിച്ചു. ജില്ലയ്ക്ക് പുറത്തു നിന്ന് വിളിച്ചാല് അതത് ജില്ലകളിലെ എസ് ടി ഡി കോഡ് ചേര്ത്താണ് ബന്ധപ്പെടേണ്ടത്.
