ഇസ്ലാമബാദ് : കശ്മീരിന്റെ സ്വതന്ത്ര ഭരണച്ചുമതല റദ്ദാക്കി കേന്ദ്ര ഭരണപ്രദേശമാക്കിയതില് മോദിയെ പിന്തുണച്ച് ഇസ്ലാമബാദില് പോസ്റ്ററുകള്. ഭരണഘടനാ ആര്ട്ടിക്കിള് 370 റദ്ദാക്കി മറ്റ് സംസ്ഥാനങ്ങളുടേത് പോലെ കശ്മീരിനേയും മാറ്റാനുള്ള തീരുമാനത്തെ അനുകൂലിച്ചുകൊണ്ടാണ് പോസ്റ്ററുകള് പ്രത്യക്ഷപ്പെട്ടിരിക്കുന്നത്.
അഖണ്ഡ ഭാരതം എന്ന പേരില് ശിവസേന നേതാവ് സഞ്ജയ് റൗട്ടിന്റെ പ്രസ്താവനയെ പോസ്റ്ററുകളില് ഉദ്ധരിക്കുന്നുണ്ട്. ‘ഇന്ന് നമ്മള് ജമ്മു കശ്മീര് തിരിച്ചു പിടിച്ചു. നാളെ ബലൂചിസ്ഥാന് തിരിച്ചുപിടിക്കും. അതിനുശേഷം പാക് അധിനിവേശ കശ്മിരും പിടിച്ചടക്കുമെന്നാണ് പോസ്റ്ററുകളില് പറയുന്നത്. അവിഭക്ത ഇന്ത്യയുടെ പടവും ഇതോടൊപ്പം ചേര്ത്തിട്ടുണ്ട്.
ഇസ്ലാമബാദിലെ അതീവ സുരക്ഷാ മേഖലകളായ റെഡ്, ബ്ലൂ സോണുകളിലാണ് പോസ്റ്ററുകള് പ്രത്യക്ഷപ്പെട്ടത്. അതുകൊണ്ടുതന്നെ സര്ക്കാര് ഇതിനെ ഗൗരവമായാണ് കണക്കാക്കുന്നത്. ഇസ്ലാമബാദ് എഫ് 6 സെക്ടറിലും പ്രസ്ക്ലബ്, അബ് പാര ചൗക്ക് എന്നിവിടങ്ങളിലുമാണ് ബാനറുകള് കണ്ടെത്തിയത്.
അതേസമയം ബൈക്കില് എത്തിയ രണ്ടംഗ സംഘമാണ് എഫ് 6 സെക്ടറുകളില് ബാനര് പതിപ്പിച്ചതെന്ന് തെളിഞ്ഞതായി പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നുണ്ട്. ഇതുമായി ബന്ധപ്പെട്ട് ഒരാള് അറസ്റ്റിലായിട്ടുമുണ്ട്.
അതിനിടെ ഇന്ത്യ അനുകൂല പോസ്റ്ററുകള് കണ്ടെത്തി അഞ്ച് മണിക്കൂറുകള്ക്ക് ശേഷമാണ് അധികൃതര് നടപടികള് ആരംഭിച്ചത്. ഇതിനെ വിമര്ശിച്ച ഇസ്ലാമബാദ് മജിസ്ട്രേറ്റ് സംഭത്തില് അടിയന്തിര അന്വേഷണത്തിനും ഉത്തരവിട്ടു.
