എഡ്ജ്ബാസ്റ്റണ്: പന്ത് ചുരണ്ടല് വിവാദത്തില്പ്പെട്ട് ഒരു വര്ഷം ക്രിക്കറ്റില് നിന്ന് പുറത്താക്കപ്പെട്ട ഓസീസ് താരം സ്റ്റീവ് സ്മിത്തിനെ അഭിനന്ദനങ്ങളില് മൂടി ക്രിക്കറ്റ് താരങ്ങള്.
തിരിച്ചുവരവിന്റെ ആദ്യ ടെസ്റ്റില് രണ്ടിന്നിങ്സിലും തകര്പ്പന് സെഞ്ചുറിയുമായി ടീമിനെ വിജയത്തിലേക്ക് നയിച്ച സ്മിത്തിനെ അഭിനന്ദിച്ചവരില് സച്ചിന്, മൈക്കല് വോണ്, ഓസീസ് ക്യാപ്റ്റന് ടിം പെയ്ന്, ധോണി തുടങ്ങി നിരവധി പേര് ഉള്പ്പെടുന്നു.
സ്മിത്ത് താങ്കള് മനോഹരമായി കളിച്ചു. എന്തൊരു തിരിച്ചുവരവാണിത്. ലിയോണിന്റെ ബൗളിങ്ങും ഗംഭീരം. ആഷസ് പരമ്പരയിലെ ആദ്യ ടെസ്റ്റ് ജയിച്ച ഓസീസിന് അഭിനന്ദനങ്ങള് എന്നായിരുന്നു ഇന്ത്യന് ബാറ്റിങ് ഇതിഹാസം സച്ചിന് ടെന്ഡുല്ക്കറുടെ പ്രതികരണം.
താന് കണ്ടിട്ടുള്ളതില് വെച്ച് ഏറ്റവും മികച്ച ടെസ്റ്റ ബാറ്റ്സ്മാന് ആണ് സ്മിത്ത് എന്നായിരുന്നു മുന് ഇംഗ്ലണ്ട് നായകന് മൈക്കല് വോണിന്റെ പ്രതികരണം.
സ്മിത്ത് സമകാലീന ക്രിക്കറ്റിലെ ഏറ്റവും മികച്ച കളിക്കാരനാണെന്ന് ഓസീസ് നായകന് ടിം പെയ്ന് മത്സരശേഷം പറഞ്ഞു. അവിശ്വസനീയമായിരുന്നു സ്മിത്തിന്റെ പ്രകടനം. അദ്ദേഹമാണ് ലോകക്രിക്കറ്റിലെ ഏറ്റവും മികച്ച ബാറ്റ്സ്മാന്. കണക്കുകള് നോക്കുകയാണെങ്കില് ഒരുപക്ഷെ ചരിത്രത്തിലെയും, പെയ്ന് പറഞ്ഞു.
