ശ്രീനഗര്: ”നിങ്ങള് നിങ്ങളുടെ മക്കളെ രക്ഷിക്കൂ… ഇന്ന് സൈന്യത്തിന് നേരെ കല്ലെറിയുന്നവര് നാളെ ഭീകരരായേക്കാം…” കശ്മീരിലെ അമ്മമാരോടുള്ള സൈന്യത്തിന്റെ അപേക്ഷയാണിത്. കമാന്ഡിങ് ഓഫീസര് ലഫ്. ജനറല് കെ.ജെ.എസ്. ധില്ലണാണ് കശ്മീരിലെ അമ്മമാരോട് മക്കളെ നിയന്ത്രിക്കാന് ആവശ്യപ്പെട്ടത്.
ചരിത്രം പരിശോധിച്ചാല് കശ്മീരിലുള്ള 83 ശതമാനം പ്രാദേശിക ഭീകരരും അവരുടെ കുട്ടിക്കാലത്ത് സൈന്യത്തിന് നേരെ കല്ലെറിഞ്ഞിട്ടുള്ളവരാണ്. അതിനാല് അമ്മമാര് ശ്രദ്ധിക്കണം. അഞ്ഞൂറ് രൂപയ്ക്കു വേണ്ടി ഇന്ന് നിങ്ങളുടെ കുട്ടി കല്ലെറിയുന്നുവെങ്കില് അവന് ഭാവിയില് ഭീകരനാകും, അദ്ദേഹം പറഞ്ഞു.
ഭീകരസംഘടനയുടെ ഭാഗമായി കൈയില് തോക്കേന്തി ഒരു വര്ഷത്തിനുള്ളില് മരണമടഞ്ഞവരാണ് കശ്മീരിലെ 64 ശതമാനം ഭീകരരും. ഭീകരരായി മാറിയശേഷം പത്ത് ദിവസത്തിനുള്ളില് ഏഴ് ശതമാനവും, ഒരു മാസത്തിനുള്ളില് ഒന്പതും, മൂന്ന് മാസത്തനുള്ളില് 17, ആറ് മാസത്തിനുള്ളില് 36 ശതമാനവും പേര് കൊല്ലപ്പെടുന്നു, അദ്ദേഹം വ്യക്തമാക്കി.
കുട്ടികള് കല്ലെറിയുന്നതില് നിന്ന് അവരെ പിന്തിരിപ്പിച്ചില്ലെങ്കില്, ഭീകരനായി തോക്ക് കയിലെടുത്ത് ഒരു വര്ഷത്തിനുള്ളില് അവന്റെ ജീവന് നഷ്ടപ്പെട്ടേക്കാം. കശ്മീരിനെ വികലമാക്കാന് കഴിയാത്തതില് പാക്കിസ്ഥാന് കടുത്ത നിരാശയിലാണെന്ന് രഹസ്യാന്വേഷണ വിഭാഗം വ്യക്തമാക്കുന്നു. കഴിഞ്ഞ കുറേ നാളുകളായി പുല്വാമ, ഷോപ്പിയാന് പ്രദേശങ്ങള് കേന്ദ്രീകരിച്ച് സ്ഫോടനം നടത്താന് പാക്കിസ്ഥാന് ലക്ഷ്യമിടുന്നു. എന്നാല്, അവരുടെ നീക്കങ്ങളെല്ലാം സൈന്യം തകര്ത്തെന്നും അദ്ദേഹം കൂട്ടിച്ചേര്ത്തു.
