ന്യൂദല്ഹി:പാക് ഭീകരര് അതിര്ത്തി കടന്ന് ആക്രമണത്തിന് ശ്രമിക്കുന്നുണ്ടെന്ന റിപ്പോര്ട്ടുകള്ക്ക് പിന്നാലെ രാജ്യത്ത് അതീവ ജാഗ്രത. ജമ്മു കശ്മീരിന് പിന്നാലെ പഞ്ചാബിലും അതീവ ജാഗ്രത പ്രഖ്യാപിച്ചു. അതിര്ത്തി പ്രദേശങ്ങളിലും കനത്ത ജാഗ്രതയ്ക്ക് നിര്ദ്ദേശം നല്കിയിട്ടുണ്ട്. അമര് നാഥ് തീര്ഥാടന വഴിയില് നിന്ന് സുരക്ഷാ സേന ആയുധങ്ങളും കുഴി ബോംബും കണ്ടെടുത്തെന്ന് സൈന്യം നേരത്തെ വ്യക്തമാക്കിയിരുന്നു.
നിലവില് 35,000 സൈനികരെ ജമ്മു കശ്മീരില് വിന്യസിക്കാന് തീരുമാനിച്ചിട്ടുണ്ട്. പതിവിന് വിപരീതമായി സൈനികരെ വ്യോമമാര്ഗ്ഗം കശ്മീരില് എത്തിക്കാനാണ് അടിയന്തിര നിര്ദ്ദേശം നല്കിയിരിക്കുന്നത്. തീര്ത്ഥാടനത്തിനായി മറ്റു സംസ്ഥാനങ്ങളില് നിന്ന് വന്ന യാത്രികരോടും വിദേശസഞ്ചാരികളോടും എത്രയും പെട്ടെന്ന് മടങ്ങി പോകാന് സര്ക്കാര് ആവശ്യപ്പെട്ടു.
അമര്നാഥ് തീര്ത്ഥാടകരെ ലക്ഷ്യം വച്ച് പാക്കിസ്ഥാന് ഭീകരര് ആക്രമണങ്ങള് നടത്താന് ശ്രമിക്കുന്നുവെന്ന് സുരക്ഷാസേന തലവന്മാര് വാര്ത്ത സമ്മേളനം നടത്തി അറിയിച്ചതിന് പിന്നാലെയാണ് അസാധാരണമായ ഉത്തരവ് ജമ്മു കശ്മീര് അഭ്യന്തര സെക്രട്ടറിയുടേതായി പുറത്തു വന്നിരിക്കുന്നത്. ആക്രമണം നടത്താന് ഭീകരര് സൂക്ഷിച്ചിരുന്ന എം 24 സ്നിപ്പര് ഗണ്ണും പാകിസ്ഥാന് നിര്മ്മിത മൈനുകളും ഇന്ത്യന് സൈന്യം കണ്ടെത്തിയിരുന്നു.
ഈ മാസം 15 വരെയാണ് അമര്നാഥ് തീര്ത്ഥാടനം. അമര്നാഥ് യാത്രയ്ക്കായി തീര്ത്ഥാടകരും വേനല്ക്കാലമായതിനാല് സഞ്ചാരികളും ധാരാളമായി കശ്മീരിലേക്ക് എത്തുന്ന സമയമാണിത്. ഇതിനിടയിലാണ് സംസ്ഥാനത്ത് വന്തോതില് സൈന്യത്തെ വിന്യസിക്കാനും സഞ്ചാരികളായി എത്തിയവരെ മടക്കി അയക്കാനുമുള്ള സര്ക്കാര് തീരുമാനം.
വിവിധ മേഖലങ്ങളില് നിലവില് ഡ്യൂട്ടിയിലുള്ള പോലീസുകാരെ അടുത്തുള്ള ചെക്ക് പോസ്റ്റുകളിലേക്ക്മാറ്റിയിട്ടുണ്ട്. നിര്ണായകമായ ചില പ്രഖ്യാപനങ്ങളോ നടപടികളോ കേന്ദ്രസര്ക്കാരില് നിന്നും ഉടനെയുണ്ടാവുമെന്നും ഇതിന് മുന്നോടിയായാണ് വന്തോതില് സൈന്യത്തെ ഇറക്കിയതെന്നുമുള്ള അഭ്യൂഹം കശ്മീരില് ശക്തമാണ്. വ്യാജവാര്ത്തകളും അഭ്യൂഹങ്ങളും കാരണം ഭയപ്പാടിലായ ജനങ്ങള് തിരിക്കിട്ട് അവശ്യവസ്തുകള് വാങ്ങി സൂക്ഷിക്കുകയാണ്.
കശ്മീരില് 280 കമ്പനി സിആര്പിഎഫ് ഭടന്മാരെ വിന്യസിച്ചുവെന്നാണ് സൂചന. ശ്രീനഗറിലേക്ക് വരാനും പോകാനുമുള്ള എല്ലാ പാതകളുടേയും നിയന്ത്രണം കേന്ദ്രസേനകള് ഏറ്റെടുത്തിരിക്കുകയാണ്. ജമ്മു കശ്മീര് പോലീസിന്റെ സാന്നിധ്യവും ചെക്ക് പോസ്റ്റുകളിലുണ്ട്. അതീവജാഗ്രത പാലിക്കണമെന്ന നിര്ദേശം വ്യോമസേനയ്ക്കും കരസേനയ്ക്കും സര്ക്കാര് നല്കിയിട്ടുണ്ട്. വ്യോമസേനയുടെ യുദ്ധവിമാനങ്ങള് വ്യാഴാഴ്ച ഉച്ചമുതല് സംസ്ഥാനത്തിന് മുകളില് നിരീക്ഷണം ശക്തമാക്കിയതായി ഒരു ദേശീയമാധ്യമം റിപ്പോര്ട്ട് ചെയ്തിട്ടുണ്ട്.
