ശ്രീനഗര്: ജമ്മു കാശ്മീല് സൈനികവിന്യാസം വര്ധിപ്പിച്ചിതിനു പിന്നാലെ അമര്നാഥ് യാത്ര അട്ടിമറിക്കാന് പാക് ഭീകര സംഘം ശ്രമിച്ചതിന്റെ തെളിവുകളുമായി ഇന്ത്യന് സൈന്യം. സൈനികര് നടത്തിയ തെരച്ചലിനിടെ അമര്നാഥ് തീര്ഥാടന പാതയ്ക്കു സമീപം തീവ്രവാദികള് ക്യാംപ് ചെയ്തിരുന്ന ഇടം കണ്ടെത്തി. ഇവിടെ നിന്ന് ടെലിസ്കോപ് സംവിധാനമുള്ള എം24 അമേരിക്കല് സ്നൈപ്പര് റൈഫിള് സൈന്യം പിടിച്ചെടുത്തു. ശ്രീനഗറില് നടത്തിയ വാര്ത്താസമ്മേളനത്തില് കമാന്ഡര് ലഫ്. ജനറല് കെജെഎസ് ധില്ലന് തന്നെയാണ് ഇക്കാര്യം വെളിപ്പെടുത്തിയത്. കൂടാതെ, ഈ ക്യാംപില് നിന്ന് പാക് സൈന്യം ഉപയോഗിക്കുന്ന അവരുടെ ചിഹ്നങ്ങള് അടങ്ങിയ മൈനും കണ്ടെത്തി. ഇതോടെ അതിര്ത്തി കടന്ന് അമര്നാഥ് തീര്ഥയാത്രയ്ക്കിടെ ആക്രമണം നടത്താന് പാക് സൈന്യത്തിന്റെ ഒത്താശയോടെ ഭീകരര് ശ്രമിക്കുന്നെന്നു ധില്ലന് വ്യക്തമാക്കി. കശ്മീരില് അശാന്തി പടര്ത്താന് പാക്കിസ്ഥാന് നിരന്തരം ശ്രമിക്കുകയാണെന്നും നിരവധി സ്ഫോടക വസ്തുക്കളാണ് അടുത്തിടെ കശ്മീരില് നിന്നു കണ്ടെടുത്തതെന്നും ധില്ലന്. ഒരാളേയും കശ്മീരിലെ ക്രമസമാധാനം തകര്ക്കാന് അനുവദിക്കില്ലെന്നും ധില്ലന്.
അമര്നാഥ് യാത്രയെ അട്ടിമറിക്കാന് പാക്കിസ്ഥാന് ഒത്താശയോടെ ഭീകകര് ശ്രമിക്കുന്നതിന്റെ തെളിവുകളാണ് ഇപ്പോള് പുറത്തുവരുന്നത്. പ്രതികൂല കാലാവസ്ഥയെ തുടര്ന്ന് ഓഗസ്റ്റ് 4വരെ അമര്നാഥ് തീര്ത്ഥയാത്ര നിര്ത്തിവെച്ചിരിക്കുകയാണ്. നിലവില് കാലാവസ്ഥ മാറ്റമില്ലാതെ തുടരുന്ന സാഹചര്യത്തില് അമര്നാഥില് വിന്യസിച്ചിരുന്ന ഒരു വിഭാഗം സൈന്യത്തെ കശ്മീരിലെ സുരക്ഷാ ചുമതലക്കായി പിന്വലിച്ചിരുന്നു. ഏകദേശം 40,000 സൈനികരെയാണ് അമര്നാഥ് തീര്ത്ഥയാത്രക്ക് സുരക്ഷയൊരുക്കാന് ചുമതലപ്പെടുത്തിയിരുന്നത്. എന്നാല്, ഇത്തരം അട്ടിമറി വിവരങ്ങള് പുറത്തുവന്ന സ്ഥിതിക്ക് തീര്ഥയാത്രയ്ക്കു കൂടുതല് സുരക്ഷ ഒരുക്കാനുള്ള നീക്കത്തിലാണ് സൈന്യം.
