ബര്‍മിങ്ഹാം: ആഷസ് പരമ്പരയിലെ ആദ്യ ടെസ്റ്റിന്റെ ഒന്നാം ഇന്നിങ്‌സില്‍ ഓസ്‌ട്രേലിയയ്‌ക്ക് ബാറ്റിങ് തകര്‍ച്ച. ഒടുവില്‍ റിപ്പോര്‍ട്ട് കിട്ടുമ്പോള്‍ ഓസീസ് എട്ട് വിക്കറ്റിന് 169 റണ്‍സ് എന്ന നിലയിലാണ്. 68 റണ്‍സുമായി സ്റ്റീവ് സ്മിത്തും 20 റണ്‍സുമായി പീറ്റര്‍ സിഡിലുമാണ് ക്രീസില്‍. ചായ സമയത്തിനുശേഷം കളി പുനരാരംഭിച്ചെങ്കിലും മഴയെ തുടര്‍ന്ന് തടസ്സപ്പെട്ടു.
സ്റ്റുവര്‍ട്ട് ബ്രോഡിന്റെയും ക്രിസ് വോക്‌സിന്റെയും പേസ് ആക്രമണമാണ് ഓസീസിന് നിരയുടെ നടുവൊടിച്ചത്. ഒരു വര്‍ഷത്തെ ഇടവേളയ്‌ക്കുശേഷം ടെസ്റ്റ് ടീമില്‍ മടങ്ങിയെത്തിയ ഓപ്പണര്‍മാരായ ബാന്‍ക്രോഫ്റ്റിനും ഡേവിഡ് വാര്‍ണര്‍ക്കും രണ്ടക്കം കടക്കാനായില്ല. 2 റണ്‍സെടുത്ത വാര്‍ണറെയും എട്ട് റണ്‍സെടുത്ത ബാന്‍ക്രോഫ്റ്റിനെയും സ്റ്റുവര്‍ട്ട് ബ്രോഡ് മടക്കി. സ്‌കോര്‍ 2ന് 17. അധികം കഴിയും മുന്‍പ് 13 റണ്‍സെടുത്ത ഉസ്മാന്‍ ഖവാജയെ വോക്‌സും മടക്കിയതോടെ ഓസീസ് മൂന്നിന് 35 എന്ന നിലയില്‍.
നാലാം വിക്കറ്റില്‍ സ്റ്റീവ് സ്മിത്തും ടിം ഹെഡും ചേര്‍ന്ന് രക്ഷാപ്രവര്‍ത്തനത്തിന് ശ്രമിച്ചെങ്കിലും സ്‌കോര്‍ബോര്‍ഡില്‍ 99 റണ്‍സായപ്പോള്‍ ഇൗ കൂട്ടുകെട്ടും വോക്‌സ് പിരിച്ചു. 35 റണ്‍സെടുത്ത ഹെഡിനെ വോക്‌സ് വിക്കറ്റിന് മുന്നില്‍ കുടുക്കി. തൊട്ടുപിന്നാലെ മാത്യു വെയ്ഡി (1)നെയും വോക്‌സ് മടക്കി. പിന്നീട് ടിം പെയ്ന്‍ (5), പാറ്റിന്‍സണ്‍ (0) എന്നിവരെ ബ്രോഡ് മടക്കിയതോടെ ഓസ്‌ട്രേലിയ 7ന് 112 എന്ന നിലയില്‍ തകര്‍ന്നു. ഒരു ഘട്ടത്തില്‍ മൂന്നിന് 99 എന്ന നിലയില്‍ നിന്നാണ് തകര്‍ച്ചയുടെ പടുകുഴിയില്‍ വീണത്. അഞ്ച് റണ്‍സെടുത്ത പാറ്റ് കമ്മിന്‍സിനെ സ്‌റ്റോക്ക്‌സും മടക്കിയതോടെ എട്ടിന് 122 എന്ന നിലയിലായി കംഗാരുക്കള്‍. ഇംഗ്ലണ്ടിന് വേണ്ടി സ്റ്റുവര്‍ട്ട് ബ്രോഡ് 38ന് നാലും വോക്‌സ് 35ന് മൂന്നും വിക്കറ്റുകളാണ് വീഴ്‌ത്തിയത്.
