മധുര:മാലദ്വീപ് മുന് വൈസ് പ്രസിഡന്റ് അഹമ്മദ് ആദീബ് അബ്ദുള് ഗഫൂര്(37) ഇന്ത്യയില് എത്തി, അതും ചരക്ക് കപ്പലില് തൂത്തുക്കുടിയില്!! കപ്പലിന് നങ്കൂരമിടാന് ഇതുവരെ അനുമതി നല്കിയിട്ടില്ല. മുന്വൈസ് പ്രസിഡന്റിനെ മടക്കി അയച്ചേക്കുമെന്നാണ് സൂചന. രാഷ്ട്രീയ അഭയം തേടിയുള്ള വരവാണോയെന്നും വ്യക്തമല്ല.
മാലദ്വീപില് ഗ്രാവല്( മണ്ണ്) ഇറക്കിയശേഷം മടങ്ങുകയായിരുന്ന വെര്ഗോ 9 എന്ന കപ്പലിലാണ് ഗഫൂര് കയറിപ്പറ്റിയത്. എട്ട് ഇന്തോനേഷ്യക്കാരും ഒരു ഇന്ത്യാക്കാരനുമടക്കം 9 ജീവനക്കാരാണ് കപ്പലില് ഉള്ളത്. ജൂലൈ 27നാണ് കപ്പല് തൂത്തുക്കുടിയിലേക്ക് മടങ്ങിയത്. യാത്രക്കിടെയാണ് പത്താമത് ഒരാള് കൂടി കപ്പലില് ഉണ്ടെന്ന സൂചനകപ്പലുടമയ്ക്ക് ലഭിച്ചത്. തുടര്ന്ന് ഇദ്ദേഹമാണ് മാലി മുന്വൈസ് പ്രസിഡന്റ് കയറിയ കാര്യം ഇന്ത്യയെ അറിയിച്ചത്.
കോസ്റ്റ്ഗാര്ഡും ഇന്റലിജന്സ് ഏജന്സികളും കപ്പലില് എത്തി അദീബിനെ ചോദ്യം ചെയ്തു. 2015 ജൂലൈ 22 മുതല് നവംബര് അഞ്ചുവരെ, മാലിദ്വീപിന്റെ അഞ്ചാം വൈസ് പ്രസിഡന്റായിരുന്നു ഇദ്ദേഹം. കപ്പലില് എങ്ങനെ കയറിപ്പയറ്റിയെന്നടതക്കം അന്വേഷിച്ചുവരികയാണ്. വിഷയം അന്താരാഷ്ട്ര തലത്തിലുള്ളതാണ്. ഇരുരാജ്യങ്ങളും തമ്മിലുള്ള ബന്ധത്തെപ്പോലും ബാധിക്കുന്നതാണ്.
2015 സപ്തംബറില്, പ്രസിഡന്റ് അബ്ദുള്ള യാമീനെ ബോട്ട് തകര്ത്ത് വധിക്കാന് ശ്രമിച്ചതിന് അറസ്റ്റിലായിരുന്ന ഇയാളെ 15 വര്ഷത്തേക്ക് തടവിന് ശിക്ഷിച്ചിരുന്നു. പക്ഷെ ഇക്കഴിഞ്ഞ മെയില് തടവ് റദ്ദാക്കിയിരുന്നു. അതിനു ശേഷം ഒതുങ്ങിക്കിഞ്ഞിരുന്ന അദീബ് ഇന്ത്യയില് തന്ത്രത്തില് കയറിക്കൂടാന് ശ്രമിച്ചതാണെന്നും സംശയമുണ്ട്.
