ബെംഗളൂരു: ലോകത്തിലെ ആദ്യ വൈമാനികന് ലങ്കാധിപതി രാവണനാണെന്ന് ശ്രീലങ്ക. 5000 വര്ഷങ്ങള്ക്ക് മുമ്പാണ് വിമാനം പറത്തിയത്. ഇത് തെളിയിക്കുന്നതിന് ആവശ്യമായ എല്ലാ തെളിവുകളും തങ്ങളുടെ പക്കല് ഉണ്ടെന്നും ശ്രീലങ്കന് സിവില് ഏവിയേഷന് അതോറിറ്റി പറയുന്നു. ശ്രീലങ്കയിലെ ബന്താരനായകെ വിമാനത്താവളത്തില് നടന്ന സിവില് ഏവിയേഷന് ഉദ്യോഗസ്ഥര്, ചരിത്രകാരന്മാര്, പുരാവസ്തുഗവേഷകര്, ശാസ്ത്രജ്ഞര്, ഭൗമ ശാസ്ത്രജ്ഞര് എന്നിവരുടെ യോഗത്തിലാണ് പുതിയ വെളിപ്പെടുത്തല്.
ഇന്നത്തെ സാങ്കേതിക വിദ്യകളുടെ കണ്ടുപിടിത്തങ്ങള്ക്ക് മുമ്പ് തന്നെ വിമാനം പറത്തിയതിനെ കുറിച്ചും അന്ന് അതിനുപയോഗിച്ച രീതികളെക്കുറിച്ചും പഠിക്കാനുള്ള പദ്ധതിയും ശ്രീലങ്കന് സര്ക്കാര് ആവിഷ്കരിച്ചു കഴിഞ്ഞു. വിമാനത്തിന്റെ കണ്ടുപിടിത്തത്തിലേക്ക് വഴിതെളിച്ച രാവണന്റെ വിമാനയാത്രയുടെ തെളിവുകള് ആര്ക്കും നിഷേധിക്കാന് കഴിയില്ല. അവ സുരക്ഷിതമായി ഇരിപ്പുണ്ടെന്നും സിവില് ഏവിയേഷന് അതേറിറ്റി വൈസ് ചെയര്മാന് ശശി ദണതുംഗെ അറിയിച്ചു.
അസാമാന്യ പ്രതിഭാശാലിയായിരുന്നു ലങ്കാധിപതി രാവണന്. വിമാനയാത്ര നടത്തിയ ആദ്യ വ്യക്തി. ഇതൊരിക്കലും കെട്ടുകഥയല്ല, യാഥാര്ഥ്യമാണ്. ഇതില് വിശദമായ ഗവേഷണം ആവശ്യമാണ്. അടുത്ത അഞ്ച് വര്ഷത്തിനുള്ളില് ഞങ്ങളിത് തെളിയിച്ചിരിക്കും അദ്ദേഹം കൂട്ടിച്ചേര്ത്തു.
5000 വര്ഷങ്ങള്ക്ക് മുമ്പ് ലങ്കയില് നിന്ന് ഇന്ത്യയിലേക്കായിരുന്നു ആദ്യമായി വിമാനം പറന്നത്. അത് തിരികെ വരികയും ചെയ്തു. എന്നാല് രാവണന് സീതയെ തട്ടിക്കൊണ്ടു പോന്നു എന്നത് അവര് നിഷേധിക്കുന്നു. രാവണന് മഹാനായ ഭരണാധികാരിയെന്നാണ് അവര് പറയുന്നത്. ഈയിടെ ലങ്ക വിക്ഷേപിച്ച ഉപഗ്രഹത്തിന് രാവണന്റെ പേരിട്ടതും അവര്ക്ക് രാവണനോടുള്ള ആരാധന വ്യക്തമാക്കുന്നു.
