ലണ്ടന്: പകരക്കാരനായി ഇറങ്ങിയ മൂസ ഡെംബെലെയുടെ ഇരട്ട ഗോളില് ലിയോണിന് ജയം. പ്രീ സീസണ് സൗഹൃദ മത്സരത്തില് അവര് പിന്നില് നിന്ന് പൊരുതിക്കയറി ആഴ്സണലിനെ കീഴടക്കി. ഒന്നിനെതിരെ രണ്ട് ഗോളുകള്ക്കാണ് ലിയോണ് വിജയിച്ചത്.
ആദ്യ പകുതിയില് ആഴ്സണലാണ് തകര്ത്താടിയത്. ഇടവേളയ്ക്ക് പത്ത് മിനിറ്റുള്ളപ്പോള് അവര് ലീഡ് നേടി. ഹെന്റിക്കിന്റെ പാസ് ഔബാമേയാങ് അനായാസം ലിയോണിന്റെ വലയിലേക്ക് അടിച്ചുകയറ്റി.
രണ്ടാം പകുതിയില് ചില മാറ്റങ്ങളുമായി ഇറങ്ങിയ ലിയോണ് ശക്തമായ തിരിച്ചുവരവ് നടത്തി. പകരക്കാരനായി കളിക്കളത്തിലിറങ്ങിയ ഡെംബെലെ രണ്ട് തവണ ആഴ്സണല് ഗോളിയെ കീഴ്പ്പെടുത്തി ലിയോണിന് വിജയം സമ്മാനിച്ചു.
മത്സരത്തിനിടെ ആഴ്സണല് താരം അലക്സാന്ദ്രെ ലകാസെറ്റേയ്ക്ക് പരിക്കേറ്റു. പരിക്ക് ഗുരുതരമല്ലെന്നും പ്രീമിയര് ലീഗില് ആഴ്സണലിന്റെ ഉദ്ഘാടന മത്സരത്തില് ലകാസെറ്റേ കളിക്കുമെന്നും ആഴ്സണല് കോച്ച് യൂനെയ് എമിറി പറഞ്ഞു. ആഗസ്ത് പതിനൊന്നിന് ന്യൂകാസിലിനെതിരെയാണ് ആഴ്സണലിന്റെ ആദ്യ മത്സരം.
