ന്യൂദല്ഹി: ആള്ക്കൂട്ട കൊലപാതകങ്ങളെ ബിജെപിയുമായി ബന്ധിപ്പിച്ച് സംസാരിക്കരുതെന്ന് ബിജെപി എം പി സുനിതാ ദുഗ്ഗല്. അതിവേഗം സംഭവിക്കുന്ന ദൗര്ഭാഗ്യകരമായ കാര്യമാണ് ഇത്. പിന്നെ എങ്ങനെ അത് ബിജെപിയുമായി ബന്ധപ്പെടുത്താനാകും. ബിജെപി ഭരിക്കുന്ന സംസ്ഥാനങ്ങളില് മാത്രമല്ല ആള്ക്കൂട്ട കൊലപാതകങ്ങള് നടന്നിരിക്കുന്നത്. കേരളത്തിലും പശ്ചിമ ബംഗാളിലും ആള്ക്കൂട്ടക്കൊലപാതകങ്ങള് നടക്കുന്നുണ്ട്. അവിടെയൊന്നും ബിജെപിയല്ല ഭരിക്കുന്നത് അപ്പോള് ഇത് സംബന്ധിച്ച് ബിജെപിയെ മാത്രം കുറ്റം പറയുന്നത് ശരിയല്ലെന്നും സുനിത പറഞ്ഞു.
ഭരണകക്ഷിയായ ബിജെപി സാമുദായിക ഐക്യത്തിന് വിഘാതം സൃഷ്ടിക്കുകയും അസഹിഷ്ണുത വളര്ത്തുന്നുണ്ടെന്ന് പ്രതിപക്ഷത്തിന്റെ ആരോപണം അടിസ്ഥാനരഹിതമാണ്.പാര്ട്ടിയുടെ പ്രത്യയശാസ്ത്രവും അന്ന് ഗുജറാത്ത് മുഖ്യമന്ത്രിയായിരുന്ന നരേന്ദ്ര മോദിയുമാണ് ബി ജെ പിയില് ചേരാന് തനിക്ക് പ്രചോദനമായതെന്നും സുനിത പറഞ്ഞു. ലോക്സഭയിലെ വനിതാ എം പിമാരുടെ പ്രാതിനിധ്യത്തില് വര്ധനയുണ്ടാവാന് വലിയൊരളവില് കാരണക്കാരന് പ്രധാനമന്ത്രി നരേന്ദ്ര മോദിയാണെന്നും അവര് കൂട്ടിച്ചേര്ത്തു.
നിരവധി വനിതാ എം പിമാരാണ് ലോക്സഭയിലേക്ക് തിരഞ്ഞെടുക്കപ്പെട്ടത്. ഇതിന് കാരണം പ്രധാനമന്ത്രി മോദിയും ബി ജെ പിയുമാണ്. അവര് ഒരുപാട് സ്ത്രീകള്ക്ക് മത്സരിക്കാന് അവസരം നല്കി. ലോക്സഭയിലെ 78 വനിതകളില് 41 പേരും ബി ജെ പിയില്നിന്നാണ്. ഹരിയാണയില്നിന്നുള്ള ഏകവനിതാ എം പി കൂടിയായ സുനിത കൂട്ടിച്ചേര്ത്തു.
മറ്റ് സംസ്ഥാനങ്ങളെ അപേക്ഷിച്ച് ഹരിയാന ലിംഗാനുപാതത്തിന് പേരുകേട്ടതാണ്. എന്നിട്ടും ലിംഗ വിവേചനം പതിവായി ഇവിടെ നിന്നും റിപ്പോര്ട്ട് ചെയ്തിട്ടുണ്ട്. അതിനെക്കുറിച്ച് വിശദമായി അന്വേഷണം നടത്തി നടപടിയെടുക്കാനും കഴിഞ്ഞിട്ടുണ്ട്. ഒരു എം.പി എന്ന നിലയില് സ്ത്രീകളുടെയും പെണ്കുട്ടികളുടെയും പ്രശ്നങ്ങള്ക്കാണ് മുന്ഗണന നല്കിയിരിക്കുന്നതെന്നും അവര് കൂട്ടിച്ചേര്ത്തു. ഇന്ത്യന് റെവന്യൂ സര്വീസ് ഉദ്യോഗസ്ഥയായിരുന്ന സുനിത സ്വയം വിരമിക്കലിനു ശേഷം 2014ലാണ് ബി ജെ പിയില് ചേര്ന്നത്.
