ന്യൂദല്ഹി: ബിജെപി എംപി രമാ ദേവിക്കെതിരായ ലൈംഗികച്ചുവയുള്ള പരാമര്ശത്തില് സമാജ്വാദി പാര്ട്ടി എംപി അസംഖാന് മാപ്പുപറയണമെന്ന് സ്പീക്കര്. വിവിധ രാഷ്ട്രീയകക്ഷി നേതാക്കളുമായി സ്പീക്കര് നടത്തിയ ചര്ച്ചക്കൊടുവിലാണ് അസംഖാന് മാപ്പു പറയണമെന്ന നിലപാടിലെത്തിയത്.
അസം ഖാനെതിരെ ലോക്സഭയില് വനിത എം.പിമാര് പാര്ട്ടിഭേദമില്ലാതെ ഒറ്റക്കെട്ടായാണ് ശബ്ദമുയര്ത്തിയത്. ലോക്സഭ ഏകകണ്ഠമായി അസം ഖാനെതിരെ പ്രമേയം പാസാക്കും.
ഇന്നലെ മുത്തലാഖ് ബില്ലിന്മേലുള്ള ചര്ച്ചയില് സംസാരിക്കവെയാണ് ലോക്സഭ നിയന്ത്രിച്ചിരുന്ന രമാ ദേവിക്കെതിരെ അസം ഖാന് മോശം പരാമര്ശം നടത്തിയത്. അസം ഖാന് മാപ്പു പറയണമെന്ന് സ്പീക്കര് ഓം ബിര്ല ഉടന് തന്നെ നിലപാടെടുത്തു. രമാ ദേവിയും അസം ഖാന് മാപ്പു പറയണമെന്ന് ആവശ്യപ്പെട്ടു.
അസം ഖാനെ സസ്പെന്ഡ് ചെയ്യണമെന്ന് കേന്ദ്ര നിയമമന്ത്രി രവിശങ്കര് പ്രസാദ് ആവശ്യപ്പെട്ടു. എല്ലാവര്ക്കും സംസാരിക്കാന് അവസരം നല്കാമെന്ന് സ്പീക്കര് വ്യക്തമാക്കിയതോടെ അസം ഖാനെതിരെ നടപടി അനിവാര്യമാണെന്ന് ഭരണ പ്രതിപക്ഷ നിരയിലെ അംഗങ്ങള് ഒറ്റക്കെട്ടായി ആവശ്യപ്പെട്ടു. സോണിയ ഗാന്ധിക്ക് നേരെയും അപകീര്ത്തികരമായ പരാമര്ശങ്ങളുണ്ടായിട്ടുണ്ടെന്ന് കോണ്ഗ്രസ് ലോക്സഭ കക്ഷി നേതാവ് അധിര് രഞ്ജന് ചൗധരി ചൂണ്ടിക്കാട്ടിയത് ബഹളത്തിന് ഇടയാക്കി.
സ്ത്രീകളുടെ ആത്മാഭിമാനവുമായി ബന്ധപ്പെട്ട വിഷയം രാഷ്ട്രീയവല്ക്കരിക്കാന് കോണ്ഗ്രസ് ശ്രമിക്കരുതെന്ന് ധനമന്ത്രി നിര്മല സീതാരാമന് പറഞ്ഞു. അച്ചടക്ക നടപടികള് ശുപാര്ശ ചെയ്യാനുള്ള പാര്ലമെന്ററി സമിതി രൂപീകരിക്കാത്തതിനാല് അസം ഖാനെതിരായ നടപടി സ്പീക്കര് തന്നെ തീരുമാനിക്കണമെന്ന് സഭാംഗങ്ങള് അഭ്യര്ഥിക്കുകയായിരുന്നു.
