ന്യൂഡല്‍ഹി: രാജ്യത്ത് ജയ് ശ്രീം രാം വിളികളെ ചൊല്ലി വിവാദം കനക്കുമ്പോള്‍ ഉഗ്രന്‍ ട്രോളുമായി പ്രശ്‌സ്ത പിന്നണി ഗായിക ആശാ ബോസ്‌ലെ 1971ല്‍ പുറത്തിറങ്ങിയ ബോളിവുഡ് ചിത്രം ഹരേ കൃഷ്ണ, ഹരേ രാമിലെ അതി പ്രശ്‌സതമായ ദാം മാരോ ദം മിത് ഗായെ ഗം ബോലോ സുബഹ് ശ്യാം ഹരേ കൃഷ്ണ, ഹരേ രാം എന്ന ഗാനം ആലപിച്ചത് ആശാ ബോല്‍സെ ആയിരുന്നു.. ഇപ്പോള്‍ ശ്രീരാമനെ വിളിക്കുന്നതില്‍ ഒരു കൂട്ടര്‍ സംഘടിതമായി എതിര്‍ക്കുന്ന സാഹചര്യത്തിലാണ് അത്തരക്കാരെ ട്വിറ്ററിലൂടെ ട്രോളി ആശ രംഗത്തെത്തിയത്. താന്‍ അന്നു പാടിയ ആ പാട്ട് ഇപ്പോള്‍ പാടാന്‍ അനുവാദമുണ്ടോ എന്നായിരുന്നു ട്വീറ്റ്. ഈ ട്വീറ്റിനെ പറ്റി മാധ്യമങ്ങള്‍ ചോദിച്ചപ്പോള്‍, ഇപ്പോഴത്തെ സാഹചര്യം കണ്ട് ട്വീറ്റ് ചെയ്തതാണെന്നും ബാക്കി കാര്യങ്ങള്‍ നിങ്ങള്‍ ഊഹിക്കാനുമായിരുന്നു ആശയുടെ മറുപടി. എന്നാല്‍, തന്റെ ട്വീറ്റ് രസകരമാണെന്നു അതിലെ കമന്റുകള്‍ കണ്ട് മനസിലായെന്നും പാട്ടുകള്‍ പാടാന്‍ തനിക്ക് ഒരു പേടിയുമില്ലെന്നും ആശ വിശദീകരിച്ചു.
മോദി സര്‍ക്കാര്‍ രണ്ടാമതും അധികാരത്തില്‍ വന്ന ശേഷം ഒരു കൂട്ടം സെലിബ്രിറ്റികള്‍ ആള്‍ക്കൂട്ട കൊലപാതകത്തിനെതിരേ പ്രധാനമന്ത്രിക്ക് തുറന്ന കത്ത് നല്‍കിയിരുന്നു. ബുധനാഴ്ചയാണ് സംവിധായകന്‍ അടൂര്‍ ഗോപാലകൃഷ്ണന്‍ ഉള്‍പ്പടെ 49 സാംസ്‌കാരിക പ്രവര്‍ത്തകര്‍ ആള്‍ക്കൂട്ട അക്രമങ്ങള്‍ക്കെതിരെയും ജയ് ശ്രീരാം വിളിപ്പിക്കലിനെതിരെയും ശക്തമായ നടപടി വേണമെന്ന് ആവശ്യപ്പെട്ട് പ്രധാനമന്ത്രിക്ക് കത്തെഴുതിയത്.
ആള്‍ക്കൂട്ട അക്രമങ്ങളും ജയ് ശ്രീരാം വിളിപ്പിക്കലും സ്വാതന്ത്ര്യത്തിന്‍ മേലുളള കടന്നുകയറ്റമെന്നായിരുന്നു ഇവരുടെ ആരോപണം. എന്നാല്‍, അത്തരം വിമര്‍ശനങ്ങള്‍ക്കുള്ള മറുപടിയുമായി സാംസ്‌കാരിക രംഗത്തെ 62 പ്രമുഖര്‍ ഇന്നു രംഗത്തെത്തിയിരുന്നു. മാവോയിസ്റ്റുകള്‍ ആദിവാസികളെ കൊല്ലുമ്പോള്‍ മിണ്ടാതിരുന്നവര്‍ സ്ഥാപിത താല്‍പര്യങ്ങള്‍ക്കുവേണ്ടിയാണ് ഇപ്പോള്‍ ശബ്ദിക്കുന്നതെന്നാണ് ഇവരുടെ കത്തിലെ ആരോപണം. നടി കങ്കണ റണാവത്ത്, ഗാനരചയിതാവ് പ്രസൂണ്‍ ജോഷി, സംവിധായകന്‍ മധൂര്‍ ഭണ്ഡാര്‍ക്കര്‍ ഉള്‍പ്പടെയുള്ള 62 പേരാണ്, അടൂരടക്കം 49 പേര്‍ പ്രധാനമന്ത്രിക്കെഴുതിയ കത്തിനെ രൂക്ഷമായി വിമര്‍ശിച്ച് രംഗത്തെത്തിയത്. രാജ്യത്തിന്റേയും ജനാധിപത്യ മൂല്യങ്ങളുടെ രക്ഷാകര്‍ത്താക്കളായി നടിക്കുന്ന 49 പേരുടെ, തിരഞ്ഞെടുത്ത വിഷയങ്ങളില്‍ മാത്രമുള്ള പ്രതികരണത്തിനും തെറ്റായ പ്രചാരണത്തിനും മറുപടിയെന്ന തലക്കെട്ടോടെയാണ് തുറന്ന കത്ത്.
രാഷ്‌ട്രീയ പ്രേരിതവും പക്ഷപാതിത്വവും പ്രകടമാക്കുന്നതെന്നാണ് 49 പേര്‍ പ്രധാനമന്ത്രിക്ക് അയച്ച കത്തെന്നാണ് ആരോപണം. മജനാധിപത്യത്തെ അപകീര്‍ത്തിപ്പെടുത്തുകയും, രാജ്യത്തിന്റെ ഐക്യത്തെ തകര്‍ക്കുകയുമാണ് കത്തെഴുതിയവരുടെ ലക്ഷ്യമെന്നും 62 പ്രമുഖരുടെ കത്തില്‍ വ്യക്തമാക്കിയിരുന്നു. ഇത്തരം ഒരു കത്തിന്റെ വാര്‍ത്ത പുറത്തു വന്ന് അല്‍പസമയത്തിനുള്ളിലാണ് ഇന്ത്യ കണ്ട് ഏറ്റവും മികച്ച പിന്നണി ഗായികമാരില്‍ ഒരാളായ ആശ പ്രധാനമന്ത്രിക്ക് ആദ്യം കത്തു നല്‍കിയ 49 പേരേയും ട്രോളി ട്വീറ്റ് ചെയ്തത്.
