ന്യൂദല്ഹി: ലോക്സഭയില് ഡെപ്യൂട്ടി സ്പീക്കറായ വനിത എംപി രമാദേവിയോട് ലൈംഗികച്ചുവയുള്ള പരാമര്ശം നടത്തിയ എസ്പി എംപി അസംഖാനെതിരേ വനിത അംഗങ്ങളുടെ കടുത്ത പ്രതിഷേധം. കേന്ദ്രമന്ത്രിമാരായ നിര്മല സീതാരാമനും സ്മൃതി ഇറാനിയും അസംഖാനെതിരേ പൊട്ടിത്തെറിച്ചു സംസാരിക്കുകയും നടപടി ആവശ്യപ്പെടുകയും ചെയ്തു. സ്ത്രീകള്ക്കു നേരേ അങ്ങേയറ്റം നീചമായ പരാമര്ശം ആണ് അസംഖാനില് നിന്നുണ്ടായത്. കടുത്ത നടപടി അസംഖാനിനെതിരേ വേണമെന്നും നിര്മല. ആണുങ്ങള് ഉള്പ്പെടെ എല്ലാ ജനപ്രതിനിധികള്ക്കും കളങ്കമാണ് അസംഖാന്റെ വാക്കുകള്. ഇതെല്ലാം കേട്ട് മിണ്ടാതിരിക്കാന് സാധിക്കില്ല. ഞങ്ങള് ഒറ്റസ്വരത്തിലാണ് അസംഖാനിനെതിരേ നടപടി ആവശ്യപ്പെടുന്നതെന്നു സ്മൃതി ഇറാനി. ജനാധിപത്യത്തിന്റെ ശ്രീകോവിലായ ഇവിടെ വന്നു കണ്ണുകള് നോക്കി സംസാരിക്കൂ എന്നടക്കം ദ്വയാര്ത്ഥമുള്ള വാക്കുകള് ഉപയോഗിക്കില്ലെന്നും എംപി എന്ന നിലയില് ഒരാളില് നിന്നു കൂടുതല് പ്രതീക്ഷിക്കുന്നെന്നും തൃണമൂല് എംപിയായ മിമി ചക്രബര്ത്തി. പ്രതിഷേധം കടുത്തതോടെ എല്ലാ പാര്ട്ടി നേതാക്കളുടേയും യോഗം വിളിക്കാമെന്നും അതില് നടപടി തീരുമാനിക്കാമെന്നും സ്പീക്കര് ഓം ബിര്ല വ്യക്തമാക്കി.
മുത്തലാഖ് ബില്ലുമായി ബന്ധപ്പെട്ട ചര്ച്ചയ്ക്കിടെയാണ് ഇന്നലെയാണു സംഭവം അരങ്ങേറുന്നത്. എനിക്ക് ഒരു അവസരം നല്കിയാല് ഞാന് നിങ്ങളില് നിന്ന് കണ്ണുകളെടുക്കില്ല എന്ന് അസം ഖാന് സഭ നിയന്ത്രിക്കുന്ന ഡപ്യൂട്ടി സ്പീക്കര് രമാ ദേവിയെ നോക്കി പറഞ്ഞു. നിങ്ങളുടെ കണ്ണുകളിലേക്ക് നോക്കുമ്പോള് നിങ്ങളോട് സംസാരിക്കുന്നതായി എനിക്ക് തോന്നുന്നു എന്നും രമാ ദേവിയെ നോക്കി അസം ഖാന് പറയുകയുണ്ടായി. ഇത് പിന്നീട് വലിയ പ്രതിഷേധങ്ങള്ക്ക് കാരണമായി. ബിജെപി എംപിയാണ് രമാ ദേവി.
ലോക്സഭയില് ഈ രീതിയിലല്ല സംസാരിക്കേണ്ടതെന്ന് രമാ ദേവി തിരിച്ചുപറഞ്ഞു. ഈ പരാമര്ശം ഒഴിവാക്കണമെന്നും രമാ ദേവി അസം ഖാനോട് ആവശ്യപ്പെട്ടു. എന്നാല്, ന്യായീകരണവുമായി അസം ഖാന്റെ മറുപടിയെത്തി. നിങ്ങള് വളരെ ബഹുമാനിക്കപ്പെടേണ്ട വ്യക്തിയാണ്. എന്റെ സഹോദരിയെ പോലെയാണ് നിങ്ങളെ ഞാന് കാണുന്നതെന്നും രമാ ദേവിയോട് അസം ഖാന് പറഞ്ഞു. പിന്നീടങ്ങോട് നിരവധി എംപിമാര് അസം ഖാനെതിരെ രംഗത്തുവന്നു. ലോക്സഭാ സ്പീക്കര് ഓം ബിര്ലയും അസം ഖാനോട് മാപ്പ് പറയണമെന്ന് ആവശ്യപ്പെട്ടു. സമാജ് വാദി പാര്ട്ടി അധ്യക്ഷന് അഖിലേഷ് യാദവും അസം ഖാനോട് ക്ഷമാപണം നടത്താന് ആവശ്യപ്പെട്ടു. അസം ഖാന് പ്രയോഗിച്ച വാക്കില് തെറ്റില്ലെന്നും എന്നാല് സ്പീക്കര് മാപ്പ് പറയണമെന്ന് ആവശ്യപ്പെട്ടിട്ടുണ്ടെങ്കില് അസം ഖാന് അത് ചെയ്യണമെന്നും അഖിലേഷ് യാദവ് പറഞ്ഞു. എന്നാല്, മാപ്പ് പറയാന് അസം ഖാന് തയ്യാറായില്ല. താന് മോശമായി ഒന്നും പറഞ്ഞിട്ടില്ലെന്ന നിലപാടിലാണ് അസം ഖാന്.
