കാര്‍ഗില്‍ യുദ്ധമുഖത്ത് സൈനികര്‍ക്കൊപ്പം നരേന്ദ്ര മോദിയും; പഴയ ചിത്രങ്ങള്‍ പുറത്തുവിട്ടു; ആ നിമിഷങ്ങള്‍ മറക്കാനാകാത്തതെന്ന് പ്രധാനമന്ത്രി

ന്യൂദല്‍ഹി: കാര്‍ഗില്‍ വിജയദിവസത്തിന്റെ 20-ാം വാര്‍ഷികത്തില്‍ യുദ്ധഭൂമിയില്‍ നിന്നുള്ള തന്റെ പഴയ ചിത്രങ്ങള്‍ പങ്കുവെച്ച് പ്രധാനമന്ത്രി നരേന്ദ്ര മോദി. 

1999 ലെ യുദ്ധകാലത്ത് കാര്‍ഗിലില്‍ നേരിട്ട് സന്ദര്‍ശിച്ച് ധീരരായ സൈനികരോട് ഐക്യദാര്‍ഢ്യം അറിയിക്കാനുള്ള അവസരം തനിക്ക് ലഭിച്ചിരുന്നു. ജമ്മു കശ്മീരിലും ഹിമാചല്‍ പ്രദേശിലും പാര്‍ട്ടി പ്രവര്‍ത്തനം നടത്തുന്ന സമയമായിരുന്നു അത്. ആ കാര്‍ഗില്‍ സന്ദര്‍ശനവും സൈനികരോട് സംസാരിക്കാനായതും ഒരിക്കലും മറക്കാനാവാത്തതാണെന്ന്  മോദി ട്വിറ്ററില്‍ കുറിച്ചു

During the Kargil War in 1999, I had the opportunity to go to Kargil and show solidarity with our brave soldiers.

This was the time when I was working for my Party in J&K as well as Himachal Pradesh.

The visit to Kargil and interactions with soldiers are unforgettable. pic.twitter.com/E5QUgHlTDS

— Narendra Modi (@narendramodi) July 26, 2019

1999 ജൂലൈ 26നാണ് ഇന്ത്യന്‍ സൈന്യം പാക്കിസ്ഥാനില്‍ നിന്നും കാര്‍ഗില്‍ മലനിരകള്‍ തിരികെപ്പിടിച്ചത്.  കനത്ത മഞ്ഞുവീഴ്ചയുള്ള സെപ്റ്റംബര്‍ മുതല്‍ ജനുവരി വരെയുള്ള കാലത്ത് അതിര്‍ത്തിയിലെ നിയന്ത്രണരേഖയ്‌ക്ക് ഇരുവശത്തുനിന്നും ഇന്ത്യയുടെയും പാക്കിസ്ഥാന്റെയും സൈന്യം പിന്‍വാങ്ങാറുണ്ട്. 

ഇന്ത്യന്‍ സേന പിന്‍വാങ്ങിയ തക്കം നോക്കി 1998 ഒക്ടോബറില്‍ കാര്‍ഗില്‍ മലനിരകളിലേക്ക് പാക്കിസ്ഥാന്‍ സൈന്യം നുഴഞ്ഞുകയറി. കൂറ്റന്‍ ബങ്കറുകള്‍ പണിത് ആയുധങ്ങളും ഭക്ഷണവും നിറച്ചു. ഏഴുമാസത്തിന് ശേഷം 1999 മേയിലാണ് ഇന്ത്യന്‍ മണ്ണിലേക്കുള്ള പാക് സൈന്യത്തിന്റെ അതിക്രമിച്ചു കടക്കല്‍ ശ്രദ്ധയില്‍ പെടുന്നത്. ആദ്യം ഇവരെ ഭീകരര്‍ എന്നാണ്  കരുതിയത്. 

തന്ത്രപ്രധാന മേഖലകളായ ദേശീയപാത ഒന്ന് മേഖലയിലെ ഏറ്റവും ഉയരമേറിയ ടൈഗര്‍ ഹില്‍സും ഇക്കാലയളവില്‍ പാക് സൈന്യം പിടിച്ചെടുത്തിരുന്നു. 1999 മേയ് അഞ്ചിന് ഇന്ത്യന്‍ സൈന്യം കാര്‍ഗില്‍ മലനിരകള്‍ തിരികെ പിടിക്കാന്‍ യുദ്ധം ആരംഭിച്ചു.

തുടക്കത്തില്‍ ഇന്ത്യന്‍ സൈന്യത്തിന് തിരിച്ചടി നേരിട്ടെങ്കിലും ഇന്ത്യയുടെ കര, വ്യോമ സേനാ വിഭാഗങ്ങളുടെ ശക്തമായ ആക്രമണത്തില്‍ പാക്കിസ്ഥാന് പിടിച്ചുനില്‍ക്കാനായില്ല. തന്ത്രപ്രധാന പാതകള്‍ ഇന്ത്യന്‍ സൈന്യം ആദ്യം പിടിച്ചെടുത്തു.

ഇന്ത്യന്‍ പീരങ്കി പടയും വ്യോമസേനയും പാക് യുദ്ധമുന്നണിയില്‍ കനത്ത നാശം വിതച്ചു. ഒടുവില്‍ 1999 ജൂലൈ 26 ന് നുഴഞ്ഞുകയറ്റക്കാരെ എല്ലാം നിയന്ത്രണരേഖയ്‌ക്ക് അപ്പുറത്തേക്ക് തുരുത്തി കാര്‍ഗില്‍ മലനിരകള്‍ ഇന്ത്യന്‍ സൈന്യം തിരിച്ചു പിടിക്കുകയായിരുന്നു.