ചെന്നൈ : രാജീവ് ഗാന്ധി വധക്കേസില്‍ ജീവപര്യന്തം തടവ് ശിക്ഷ അനുഭവിച്ചു വരുന്ന നളിനി ശ്രീഹരന്‍ പരോളിലിറങ്ങി. മകളുടെ വിവാഹത്തില്‍ പങ്കെടുക്കുന്നതിനും ഒരുക്കങ്ങള്‍ നടത്തുന്നതിനുമായി ഒരുമാസത്തെ പരോളാണ് നളിനി പുറത്തിറങ്ങിയത്. വെല്ലൂര്‍ ജയിലില്‍ നിന്ന് ഇന്ന് രാവിലെയാണ് പുറത്തിറങ്ങിയത്.
യു.കെയില്‍ വൈദ്യപഠനം നടത്തുന്ന മകള്‍ ഹരിത വിവാഹത്തിനായി അടുത്ത ആഴ്ച എത്തും. അതേസമയം നളിനിക്ക് വെല്ലൂര്‍ വിടുന്നതിനും മാധ്യമങ്ങളേയും രാഷ്‌ട്രീയക്കാരേയും കാണുന്നതിനും വിലക്കുണ്ട്. കര്‍ശ്ശന ഉപാധിയില്‍ കഴിഞ്ഞമാസമാണ് ഇവര്‍ക്ക് മദ്രാസ് ഹൈക്കോടതി പരോള്‍ അനുവദിച്ചത്.
പിതാവിന്റെ സംസ്‌കാര ചടങ്ങില്‍ പങ്കെടുക്കുന്നതിന് കഴിഞ്ഞ വര്‍ഷം നളിനിക്ക് ഒരു ദിവസത്തെ പരോള്‍ അനുവദിച്ചിരുന്നു. ഇത് കൂടാതെ 28 വര്‍ഷത്തിനുള്ളില്‍ ആദ്യമായാണ് നളിനി പുറത്തിറങ്ങുന്നത്. നളിനിയുടെ ഭര്‍ത്താവ് മുരുകനും ഇതേ ജയിലില്‍ ജീവപര്യന്തം തടവ് ശിക്ഷ അനുഭവിക്കുന്നുണ്ട്.
കേസില്‍ ഇവര്‍ക്ക് നേരത്തെ കോടതി വധശിക്ഷ വിധിച്ചെങ്കിലും സോണിയ ഗാന്ധിയുടെ ഇടപെടലിനെ തുടര്‍ന്ന് ശിക്ഷ ജീവപര്യന്തമാക്കുകയായിരുന്നു. ജയിലില്‍ വെച്ചാണ് നളിനി മകള്‍ക്ക് ജന്മം നല്‍കിയത്. തമിഴ്നാട് മന്ത്രിസഭ നളിനിയെ വിട്ടയക്കാന്‍ ശുപാര്‍ശ നല്‍കിയിട്ടുണ്ടെങ്കിലും ഗവര്‍ണര്‍ ഇക്കാര്യത്തില്‍ തീരുമാനമെടുത്തിട്ടില്ല.
ചെന്നൈയില്‍ നിന്നും 140 കിലോ മീറ്റര്‍ മാറി വെല്ലൂര്‍ പട്ടണത്തിലാണ് നളിനി പരോള്‍ കാലയളവില്‍. ഇവിടെ വിവാഹാവശ്യത്തിനായി ഒരു വീട് വാടകയ്‌ക്കെടുത്തിട്ടുണ്ട്. മകള്‍ ഹരിത, അമ്മ പദ്മാവതി, സഹോദരി കല്ല്യാണി, സഹോദരന്‍ ഭാഗ്യനാഥന്‍ എന്നിവരോടൊപ്പമായിരിക്കും ഒരു മാസം നളിനി താമിക്കുന്നത്.
