ടോക്കിയോ: ടോക്കിയോ ഒളിമ്പിക്‌സിലെ ജേതാക്കള്‍ക്ക് സമ്മാനിക്കുന്ന മെഡലുകളുടെ മാതൃക സംഘടകര്‍ ഇന്നലെ പുറത്തിറക്കി. ഗെയിംസിന് തിരിതെളിയാന്‍ കൃത്യം ഒരു വര്‍ഷം ശേഷിക്കെയാണ് മെഡലുകളുടെ മാതൃക പുറത്തുവിട്ടത്. അടുത്ത വര്‍ഷം ജൂലൈ 24 മുതല്‍ ആഗസ്ത് ഒമ്പതുവരെയാണ് ടോക്കിയോ ഒളിമ്പിക്‌സ്.
ഇലക്‌ട്രോണിക്‌സ് മാലിന്യത്തില്‍ നിന്ന് വേര്‍തിരിച്ചെടുത്ത സ്വര്‍ണവും വെള്ളിയും വെങ്കലവുമാണ് മെഡലുകള്‍ നിര്‍മിക്കാന്‍ ഉപയോഗിക്കുന്നതെന്ന് സംഘാടകര്‍ വെളിപ്പെടുത്തി. പരിശുദ്ധമായ വെള്ളിയില്‍ ആറു ഗ്രാം സ്വര്‍ണം പൂശിയാണ് സ്വര്‍ണമെഡല്‍ ഉണ്ടാക്കുന്നത്. വെള്ളി മെഡല്‍ പരിശുദ്ധമായ വെള്ളി ഉപയോഗിച്ചും. ഗെയിംസിന്റെ അവസാനപാദ കൗണ്ട് ഡൗണ്‍ ആരംഭിക്കുന്നതിന്റെ ഭാഗമായാണ് മെഡലുകളുടെ മാതൃകകള്‍ പുറത്തിറക്കിയത്.
സാങ്കേതിക വിദ്യയില്‍ മറ്റുരാജ്യങ്ങളെക്കാള്‍ ഏറെ മുന്നില്‍ നില്‍ക്കുന്ന ജപ്പാന്‍ ഹൈടെക്ക് വേദികളാണ് ഒളിമ്പിക്‌സിനായി ഒരുക്കുന്നത്. വേദികളില്‍ വിവിധ ആവശ്യങ്ങള്‍ക്കായി റോബോട്ടുകളെയും ഉപയോഗിക്കും. ജപ്പാന്‍ എല്ലാവരെയും ക്ഷണിച്ചുകഴിഞ്ഞു.
ഗെയിംസിനുള്ള ഒരുക്കങ്ങള്‍ തകൃതിയായി നടത്തുന്നതിന് ടോക്കിയോ ഒളിമ്പിക്‌സ് സംഘാടസ സമിതിയെ ഒളിമ്പിക് കമ്മിറ്റി തലവന്‍ തോമസ് ബാച്ച് അഭിനന്ദിച്ചു. ഗെയിംസിന് ഒരു വര്‍ഷം ശേഷിക്കെ ഒരുക്കങ്ങള്‍ അതിവേഗം പൂര്‍ത്തിയായി വരുകയാണ്.
നാനൂറോളം പ്രൊഫഷണല്‍ ഡിസൈനര്‍മാരില്‍ നിന്നുള്ള മാതൃകകള്‍ സ്വീകരിച്ചാണ് ഒളിമ്പിക് മെഡലുകള്‍ക്ക് രൂപം നല്‍കിയത്. ജുനിച്ചി കവാനിഷിയുടെ മാതൃകയാണ് സംഘാടകര്‍ തെരഞ്ഞെടുത്തത്. എന്റെ മാതൃക തെരഞ്ഞെടുക്കുമെന്ന് സ്വപ്‌നത്തില്‍പ്പോലും കരുതില്ലെന്ന് ജുനിച്ചി പറഞ്ഞു.
മെഡലുകള്‍ക്ക് 556നും 450 ഗ്രാമിനും ഇടയില്‍ തൂക്കമുണ്ടായിരിക്കും. ഇ- വേസ്റ്റില്‍ നിന്ന്് വേര്‍തിരിച്ചെടുക്കുന്ന ലോഹങ്ങള്‍ ഉപയോഗിച്ചാണ് മെഡലുകള്‍ നിര്‍മിക്കുക. ടോക്കിയോ ഒളിമ്പിക്‌സ് പരിസ്ഥിതി സൗഹൃദമാക്കുന്നതിന്റെ ഭാഗമായാണ് ജനങ്ങളില്‍ നിന്ന് ഇ- വേസ്റ്റ് സ്വീകരിച്ച മെഡലുകള്‍ നിര്‍മിക്കാന്‍ സംഘാടക സമിതി തീരുമാനിച്ചത്്.
പുതുതായി നിര്‍മിക്കുന്ന സ്ഥിരം വേദികളില്‍ പകുതിയും പൂര്‍ത്തിയായി. ബാക്കിയുള്ളവയുടെ നിര്‍മാണം അതിവേഗത്തില്‍ നടക്കുകയാണെന്ന് സംഘാടകര്‍ അറിയിച്ചു. ഇത് രണ്ടാം തവണയാണ് ടോക്കിയോ ഒളിമ്പിക്‌സിന് വേദിയൊരുക്കുന്നത്. 1964 ല്‍ ടോക്കിയോ ഒളിമ്പിക്‌സിന് ആതിഥേയത്വം വഹിച്ചിരുന്നു.
ഇത്തവണ കരാട്ടെ, സ്‌പോര്‍ട്‌സ് ക്ലൈംബിങ്, സ്‌കേറ്റ് ബോര്‍ഡിങ് തുടങ്ങിയവ ഒളിമ്പിക്‌സില്‍ അരങ്ങേറ്റം കുറിക്കും. ബേസ്്‌ബോളും സോഫ്റ്റ് ബോളും തിരിച്ചെത്തും.
