മുംബൈ: സൂപ്പര്‍ ഓവറിലും ടീമുകള്‍ ഒപ്പത്തിനൊപ്പം നിന്നാല്‍ മറ്റൊരു സൂപ്പര്‍ ഓവറിലൂടെയാണ് വിജയികളെ തീരുമാനിക്കേണ്ടതെന്ന് ഇന്ത്യന്‍ ഇതിഹാസം സച്ചിന്‍ ടെന്‍ഡുല്‍ക്കര്‍. ലോകകപ്പ് ഫൈനലില്‍ ബൗണ്ടറികളുടെ എണ്ണം നോക്കി ജേതാക്കളെ തീരുമാനിച്ചതിന്റെ പശ്ചാത്തലത്തിലാണ് സച്ചിന്റെ പ്രതികരണം.
മത്സരത്തില്‍ ഏറ്റവും കൂടുതല്‍ ബൗണ്ടറി നേടിയ ടീമിനെ ജേതാക്കളാക്കുന്നത് ശരിയല്ല. സൂപ്പര്‍ ഓവര്‍ സമനിലയായാല്‍ മറ്റൊരു സൂപ്പര്‍ ഓവറിലൂടെ വിജയികളെ നിശ്ചയിക്കണം. ലോകകപ്പ് ഫൈനല്‍ മാത്രമല്ല. എല്ലാ മത്സരങ്ങളും പ്രധാനപ്പെട്ടതാണ്. ഫുട്‌ബോളില്‍ നിശ്ചിത സമയത്ത് സമനിലയാവുന്ന നോക്കൗട്ട് മത്സരങ്ങള്‍ എക്‌സ്ട്രാ ടൈമിലേക്ക് കടക്കുമ്പോള്‍ മറ്റു കാര്യങ്ങളൊന്നും തന്നെ അവിടെ പരിഗണിക്കാറില്ലല്ലോയെന്നും അദ്ദേഹം പറഞ്ഞു.
ലോര്‍ഡ്‌സില്‍ അരങ്ങേറിയ ഇംഗ്ലണ്ട്- ന്യൂസിലന്‍ഡ് ലോകകപ്പ് ഫൈനല്‍ മത്സരം ടൈ ആയി. സൂപ്പര്‍ ഓവറിലും ഇരു ടീമുകളും തുല്യത പാലിച്ചു. തുടര്‍ന്ന് മത്സരത്തിലാകെ ഏറ്റവും കൂടുതല്‍ ബൗണ്ടറികള്‍ നേടിയ ഇംഗ്ലണ്ടിനെ ജേതാക്കളായി പ്രഖ്യാപിക്കുകയായിരുന്നു.
