ന്യുദല്ഹി : കേന്ദ്ര ബജറ്റില് കടയുടമകള്ക്കും, റീട്ടെയ്ല് വ്യാപാരികള്ക്കും പെന്ഷന് പദ്ധതി പ്രഖ്യാപിച്ച് കേന്ദ്ര ധനമന്ത്രി നിര്മല സീതാരാമന്. പ്രധാനമന്ത്രി കര്മയോഗി സ്കീം എന്ന പേരില് രാജ്യത്തെമ്പാടും മൂന്നു കോടി വ്യാപാരികള്ക്ക് പെന്ഷന് സുരക്ഷ ഉറപ്പാക്കുന്ന വന് പദ്ധതിക്കാണ് ബജറ്റില് പ്രഖ്യാപനം നടത്തിയിരിക്കുന്നത്. ഇത് ഉടന് നടപ്പാക്കുമെന്ന് ധനമന്ത്രി വ്യക്തമാക്കി.
1.5 കോടിയില് കുറവ് വിറ്റുവരവുള്ളവര്ക്കാണ് പെന്ഷന് സുരക്ഷ ലഭിക്കുക. പെന്ഷന് സ്കീം ലഭിക്കാനുള്ള വഴികള് ലളിതമായിരിക്കുമെന്ന് നിര്മ്മലാ സീതാരാമന് വ്യക്തമാക്കി. ആധാര് കാര്ഡിനും, ഒരു തിരിച്ചറിയല് രേഖയ്ക്കും ഒപ്പം സെല്ഫ് ഡിക്ലറേഷനും നടത്തിയാല് പെന്ഷന് സ്കീമില് അംഗമാകാം.
‘ഗാവ്, ഗരീബ്, കിസാന്’എന്നിവയുടെ വികസനം ലക്ഷ്യമിട്ടുകൊണ്ടുള്ള ബജറ്റാണ് ഇത്തവണ അവതരിപ്പിക്കുന്നതെന്ന് നിര്മ്മല സീതാരാമന് വ്യക്തമാക്കി. ചെറുകിട വ്യവസായികള്ക്ക് ക്വിക്ക് ലോണുകള് ലഭിക്കാനുള്ള നടപടികളുണ്ടാകും. വായ്പ്പാത്തുക പെട്ടെന്ന് ലഭിക്കാന് ഒരു പേയ്മെന്റ് പ്ലാറ്റ് ഫോം ഉണ്ടാക്കും.
ജിഎസ്ടിയില് രജിസ്റ്റര് ചെയ്ത എല്ലാ ചെറുകിട, ഇടത്തരം വ്യവസായങ്ങള്ക്കും, 2 ശതമാനം പലിശയിളവ് ലഭിക്കും. ഇതിനായി 350 കോടി രൂപ വകയിരുത്തി. 80 ബിസിനസ് ഇന്ക്യുബേറ്ററുകളും, 20 ടെക്നോളജി ബിസിനസ് ഇന്ക്യുബേറ്ററുകളും ഈ സാമ്പത്തിക വര്ഷം തന്നെ നിര്മിക്കും. ആസ്പയര് എന്ന ഈ പ്രോജക്ടിലൂടെ, കാര്ഷിക- ഗ്രാമീണ മേഖലകളില് 75,000 സ്കില്ഡ് സംരംഭകരെയെങ്കിലും പുറത്തിറക്കുകയാണ് ലക്ഷ്യം.
സാമൂഹ്യസുരക്ഷയ്ക്കായി പ്രവര്ത്തിക്കുന്ന കമ്പനികള്ക്കും സന്നദ്ധ സംഘടനകള്ക്കും പണം ലഭിക്കാനായി ഒരു ‘സോഷ്യല് സ്റ്റോക്ക് എക്സ്ചേഞ്ച്’ രൂപീകരിക്കും. ഇതില് ലിസ്റ്റ് ചെയ്യുന്ന ഓഹരികളിലൂടെ സാമൂഹ്യസുരക്ഷാ പ്രോജക്ടുകള്ക്ക് പണം കണ്ടെത്താം.
