പത്തനംതിട്ട: ശബരിമലയെ തകര്ക്കാനുള്ള സംസ്ഥാന സര്ക്കാരിന്റെ ശ്രമങ്ങള് തുടരുന്നതിനിടെ തീര്ത്ഥാടനകാലത്തെ ശരണം വിളികള് കടുത്ത ശബ്ദമലിനീകരണത്തിന് കാരണമാകുന്നുവെന്ന് റിപ്പോര്ട്ട് നല്കി വനംവകുപ്പ്. തീര്ത്ഥാടന കാലത്ത് ശബരിമലയില് നിന്നുണ്ടാകുന്ന ശരണംവിളികളുള്പ്പെടെയുള്ള കാര്യങ്ങള് കടുത്ത പരിസ്ഥിതി പ്രശ്നങ്ങള്ക്ക് കാരണമാകുന്നുവെന്ന് റിപ്പോര്ട്ടില് പറയുന്നു.
ശബരിമലയിലെ പാരിസ്ഥിതിക പ്രശ്നങ്ങളെ സംബന്ധിച്ച് കേന്ദ്രത്തിന് നല്കിയ ഇക്കോടൂറിസം വികസന റിപ്പോര്ട്ടിലാണ് വനംവകുപ്പ് ഇക്കാര്യങ്ങള് പറയുന്നത്. ശബരിമല തീര്ത്ഥാടന കാലത്ത് തീര്ത്ഥാടകര് കൊണ്ടുവരുന്ന പ്ലാസ്റ്റിക് മാലിന്യങ്ങള്, ഉപേക്ഷിക്കുന്ന തുണികള്, രാത്രി ക്ഷേത്രത്തിലേക്കുള്ള സഞ്ചാരങ്ങള് മൂലമുണ്ടാകുന്ന പ്രശ്നങ്ങള്, വനങ്ങളില് നിര്മ്മിക്കുന്ന താല്ക്കാലിക ക്യാമ്പുകള്, എന്നിവ മൂലം വനം പ്രദേശത്ത് കടുത്ത പാരിസ്ഥിതിക പ്രശ്നങ്ങളാണ് ഉണ്ടാകുന്നതെന്നും വനംവകുപ്പിന്റെ റിപ്പോര്ട്ടില് പറയുന്നു.
തീര്ത്ഥാടന സമയത്ത് ഇത്തരത്തിലുള്ള പ്രവര്ത്തനങ്ങള് മൂലം ശബരിമലയുടെയും പാരിസ്ഥിതിക പവിത്രതയെ ബാധിക്കുന്നതിനാല് തീര്ത്ഥാടകരെ നിയന്ത്രിക്കാന് ഇടപെടണമെന്നും റിപ്പോര്ട്ടില് പറയുന്നുവെന്ന് ഒരു ദേശീയമാധ്യമം റിപ്പോര്ട്ട് ചെയ്യുന്നു.
വനംവകുപ്പിന്റെ റിപ്പോര്ട്ടിനെതിരെ ദേവസ്വം ബോര്ഡ് പ്രസിഡന്റ് എ. പത്മകുമാര് രംഗത്തെത്തി. ശബരിമലയിലെ വികസനത്തിന് വനംവകുപ്പ് തടസം നില്ക്കുന്നതായി പത്മകുമാര് ആരോപിച്ചു. തീര്ത്ഥാടനം സുഗമമാക്കുന്നതിന് ബോര്ഡുമായി സഹകരിക്കുന്നതിനുപകരം തീര്ത്ഥാടനകാലത്തെ അട്ടിമറിക്കാനുള്ള ശ്രമങ്ങളാണ് വനംവകുപ്പ് ഇത്തരത്തിലുള്ള റിപ്പോര്ട്ട് നല്കിയതിലൂടെ ചെയ്തിരിക്കുന്നതെന്നും പദ്മകുമാര് പറഞ്ഞു.
