ന്യൂദല്‍ഹി: നേതാക്കളുടെ ‘നാടക’കൂട്ടരാജിയിലൂടെ കോണ്‍ഗ്രസ്സിനെ കൂടുതല്‍ കുഴപ്പത്തിലാക്കിയ അധ്യക്ഷന്‍ രാഹുല്‍ ഗാന്ധി വീണ്ടും വിദേശത്തേക്ക് പോകും. സമരം ചെയ്തിട്ട് യാതൊരു പ്രയോജനമില്ലെന്ന് കണ്ടതോടെ രാഹുല്‍ഗാന്ധി തന്നെ എഐസിസി അധ്യക്ഷസ്ഥാനത്ത് തുടരണമെന്ന ആവശ്യവുമായെത്തിയ പ്രവര്‍ത്തകര്‍ പിന്മാറി. പാര്‍ട്ടി അധ്യക്ഷസ്ഥാനത്തെച്ചൊല്ലിയുള്ള പ്രതിസന്ധി തുടരുകയാണ്. പകരക്കാരനെക്കുറിച്ചുള്ള ചര്‍ച്ചകള്‍ തുടങ്ങിയെങ്കിലും അതിനും രാഹുല്‍ മുഖം നല്‍കുന്നില്ല. പ്രവര്‍ത്തക സമിതി വിളിക്കുന്ന കാര്യത്തിലും അനിശ്ചിതത്വം തുടരുകയാണ്.
വിദേശത്തുള്ള സഹോദരീ ഭര്‍ത്താവ് റോബര്‍ട്ട് വദ്രയെ സന്ദര്‍ശിക്കാനാണ് രാഹുല്‍ വിദേശത്തേക്ക് പോകുന്നത്. സാമ്പത്തിക ക്രമക്കേടില്‍ എന്‍ഫോഴ്‌സമെന്റ് ഡയറക്ട്രേറ്റിന്റെ അന്വേഷണം നേരിടുന്ന വദ്രക്ക് കുടലിലെ ശസ്ത്രക്രിയക്കായി അമേരിക്കയിലോ നെതര്‍ലാന്‍ഡ്‌സിലോ ചികിത്സ തേടാന്‍ സിബിഐ കോടതി അനുമതി നല്‍കിയിരുന്നു. പക്ഷേ, ചികിത്സാകേന്ദ്രം എവിടെയെന്ന വിവരം പുറത്ത് വിട്ടിട്ടില്ല. അതിനാല്‍ രാഹുലിന്റെ സന്ദര്‍ശന വിവരങ്ങളും വ്യക്തമല്ല. ശനിയാഴ്ച സോണിയ ഗാന്ധിക്കൊപ്പം പോകുന്ന രാഹുല്‍ അടുത്ത ബുധനാഴ്ചയോടെയാണ് മടങ്ങിയെത്തുക. ഇതോടെ കോണ്‍ഗ്രസിന് നാഥനില്ലാത്ത അവസ്ഥയാണ്.
രാജിഭീഷണി തുടരുന്ന രാഹുലിന് പിന്തുണയുമായി ഇതുവരെ 120ലേറെ നേതാക്കളാണ് സ്ഥാനമൊഴിഞ്ഞത്. ഇത് തുടര്‍ന്നാല്‍ പാര്‍ട്ടിയില്‍ അരാജകത്വമുണ്ടാകുമെന്ന് മുതിര്‍ന്ന നേതാക്കള്‍ മുന്നറിയിപ്പ് നല്‍കുന്നു. ‘അധ്യക്ഷന്‍ രാജിയിലാണ്. പിന്നെ ആര്‍ക്കാണ് ഞങ്ങള്‍ രാജി സമര്‍പ്പിക്കേണ്ടത്. പല സംസ്ഥാനങ്ങളിലും പാര്‍ട്ടി തെരഞ്ഞെടുപ്പിലെ തിരിച്ചടി വിലയിരുത്തുകയാണ്. മുഖ്യമന്ത്രിമാര്‍ രാജിവെക്കുന്നത് സര്‍ക്കാരുകളെ അസ്ഥിരപ്പെടുത്തും. എന്താണ് ഇതുകൊണ്ടുള്ള നേട്ടം’, ഒരു നേതാവ് ചോദിച്ചു. ഏതാനും മുതിര്‍ന്ന നേതാക്കളെ ഒഴിവാക്കുകയെന്ന ലക്ഷ്യത്തോടെയാണ് തെരഞ്ഞെടുപ്പിലെ കനത്ത തോല്‍വിക്ക് പിന്നാലെ രാഹുല്‍ രാജി പ്രഖ്യാപിച്ചത്. തോല്‍വിയുടെ ഉത്തരവാദിത്വം ഏറ്റെടുത്ത് മറ്റ് നേതാക്കള്‍ രാജിവെക്കുമെന്നായിരുന്നു അദ്ദേഹം കരുതിയത്. എന്നാല്‍ രാഹുലിനെ ആശ്വസിപ്പിച്ചതല്ലാതെ ഒരു മാസമായിട്ടും ഒരാളും തോല്‍വിയുടെ പാപഭാരം ചുമലിലേറ്റിയില്ല.
മുഖ്യമന്ത്രിമാരായ അശോക് ഗെഹ്ലോട്ട്, കമല്‍നാഥ് എന്നിവരെ പേരെടുത്ത് പാര്‍ട്ടി യോഗത്തില്‍ രാഹുലും പ്രിയങ്കയും വിമര്‍ശിച്ചെങ്കിലും അവര്‍ രാജിക്ക് തയ്യാറായില്ല. ഈ രണ്ടു പേരെയാണ് രാഹുല്‍ പ്രധാനമായി ലക്ഷ്യമിടുന്നതെന്ന് സൂചനയുണ്ട്. മധ്യപ്രദേശിലെ തോല്‍വിയില്‍ തനിക്കാണ് ഉത്തരവാദിത്വമെന്ന് കമല്‍നാഥ് കഴിഞ്ഞ ദിവസം പ്രസ്താവന നടത്തിയെങ്കിലും രാജി കാര്യത്തില്‍ മൗനം പാലിച്ചു. തന്റെ തന്ത്രം പാളിയതിലെ നിരാശ രാഹുല്‍ ഏതാനും ദിവസം മുന്‍പ് യുവനേതാക്കളോട് തുറന്നുപറഞ്ഞു. ഇതിന് പിന്നാലെയാണ് രാഹുലിന് ഐക്യദാര്‍ഢ്യവുമായി രാജി പ്രവഹിച്ചത്. യൂത്ത് കോണ്‍ഗ്രസ് വൈസ് പ്രസിഡന്റ് ശ്രീനിവാസ്, തെലങ്കാന, ബിഹാര്‍, മധ്യപ്രദേശ് ചുമതല വഹിക്കുന്ന പൂനം പ്രഭാകര്‍, വീരേന്ദ്ര റാത്തോഡ്, ദീപക് ബബാരിയ, ദല്‍ഹി വര്‍ക്കിങ് പ്രസിഡന്റ് രാജേഷ് ലിലോതിയ തുടങ്ങിയവരാണ് രാജിസമര്‍പ്പിച്ചത്.
