ന്യൂദല്ഹി: പുല്വാമ ഭീകരാക്രമണത്തിന് തിരിച്ചടിയായി ബലാക്കോട്ടില് ഇന്ത്യ നടത്തിയ വ്യോമാക്രമണത്തിന്റെ അനുഭവം പങ്കുവെച്ച് ആക്രമണത്തില് നേരിട്ട് പങ്കെടുത്ത രണ്ട് വ്യോമസേനാ പൈലറ്റുമാര്. ഒരു ദേശീയ മാദ്ധ്യമത്തിന് നല്കിയ അഭിമുഖത്തിലാണ് അവര് ഇക്കാര്യം വ്യക്തമാക്കിയത്.
സ്വന്തം കുടുംബക്കാരെപ്പോലും അറിയിക്കാതെ അതീവ രഹസ്യമായാണ് പാകിസ്ഥാനെതിരെയുള്ള ദൗത്യത്തില് പങ്കെടുത്തത്. 90 സെക്കന്ഡിനുള്ളില് ആക്രമണം അവസാനിപ്പിച്ച് തങ്ങള് തിരികെയെത്തിയെന്നും അവര് പറയുന്നു. ഇങ്ങനെയൊരു മിഷനെക്കുറിച്ച് അറിഞ്ഞപ്പോള് തന്നെ ഭയങ്കര ടെന്ഷനിലായിരുന്നു. എന്നാല് ഒരുപാട് കാര്യങ്ങള് ചെയ്യാനുണ്ടായിരുന്നതിനാല് എല്ലാം പെട്ടെന്ന് കഴിഞ്ഞത് പോലെ തോന്നിയതായും ആക്രമണത്തില് പങ്കെടുത്ത മിറാഷ് 2000 യുദ്ധവിമാനത്തിന്റെ പൈലറ്റ് പറയുന്നു.
ആക്രമണത്തിനിടെ പാകിസ്ഥാനില് നിന്നുള്ള പ്രത്യാക്രമണം ഉണ്ടാകുമോ എന്നായിരുന്നു എല്ലാവരുടെയും ഉത്കണ്ഠ. പാകിസ്ഥാന്റെ റഡാറുകളില് പെടരുതെന്ന് തങ്ങള്ക്ക് പ്രത്യേക നിര്ദ്ദേശം ലഭിച്ചിരുന്നു. ആക്രമണത്തിന് മുമ്പ് ഒരു പാകിസ്ഥാനി പോര്വിമാനം തങ്ങള്ക്ക് നേരെ വരുന്നുണ്ടെന്ന മുന്നറിയിപ്പ് ലഭിച്ചിരുന്നു. ഉടന് തന്നെ ബോംബുകള് വര്ഷിച്ച് തങ്ങള് ധൈര്യത്തോടെ മടങ്ങിയതായും ഇങ്ങനെയൊരു ഓപ്പറേഷനില് പങ്കെടുക്കാന് കഴിഞ്ഞതില് സന്തോഷമുണ്ടെന്നും പൈലറ്റുമാര് കൂട്ടിച്ചേര്ത്തു.
സുരക്ഷാ കാരണങ്ങളാല് അഭിമുഖം നല്കിയ പൈലറ്റുമാരുടെ പേര് വിവരങ്ങള് പുറത്ത് വിട്ടിട്ടില്ല. ഫെബ്രുവരി 14ന് കാശ്മീരിലെ പുല്വാമയില് 40 സി.ആര്.പി.എഫ് ജവാന്മാരുടെ ജീവനെടുത്ത ഭീകരാക്രമണത്തിന് പകരമായി ഫെബ്രുവരി 26നാണ് വ്യോമസേനയുടെ രണ്ട് മിറാഷ് 2000 വിമാനങ്ങള് അതിര്ത്തി കടന്ന് ബോംബാക്രമണം നടത്തിയത്.
