കൊച്ചി: ഒരിടവേളയ്ക്ക് ശേഷം ഈസ്റ്റ് കോസ്റ്റ് വിജയന് സംവിധാനം ചെയ്യുന്ന ചിത്രം ‘ചില ന്യൂജെന് നാട്ടുവിശേഷങ്ങളു’ടെ മ്യൂസിക്, ട്രെയിലര് ലോഞ്ച് കൊച്ചിയില് നടന്നു. ചൊവ്വാഴ്ച വൈകുന്നേരം കലൂര് ഐ.എം.എ ഹാളില് നടന്ന വര്ണാഭമായ ചടങ്ങില് നടന് ദിലീപ് ആണ് ഓഡിയോ-ട്രെയിലര് പ്രകാശനം നിര്വഹിച്ചത്. സിനിമ-സീരിയല്-രാഷ്ട്രീയ-സാംസ്കാരിക രംഗത്തെ പ്രമുഖരുടെ സാന്നിധ്യത്തിലായിരുന്നു ചടങ്ങ്.
വന് കരഘോഷത്തോടെയാണ് ഗാനങ്ങളും ട്രെയിലറും പ്രേക്ഷകര് സ്വീകരിച്ചത്. അതിമനോഹരമായ സംഗീതത്തില് അതീവ ദൃശ്യചാരുതയോടെ ഒരുക്കിയ ഗാനങ്ങള് അതിഥികളുടെ മനം കവര്ന്നു. എം. ജയചന്ദ്രന് ഈണമിട്ട അഞ്ച് ഗാനങ്ങളാണ് ചിത്രത്തില് ഉള്ളത്. മൂന്ന് ഗാനങ്ങളുടെ രചന സന്തോഷ് വര്മയും രണ്ട് ഗാനങ്ങളുടെ വരികള് ഈസ്റ്റ് കോസ്റ്റ് വിജയന്റേതുമാണ് . ചിത്രത്തിലെ ഗാനങ്ങള് ആലപിച്ചിരിക്കുന്നത് യേശുദാസ്, ശങ്കര് മഹാദേവന്, പി. ജയചന്ദ്രന്, എം.ജി ശ്രീകുമാര്, ശ്രേയാ ഘോഷാല് എന്നിവരാണ്.
‘പുതിയ പുതിയ കലാകാരന്മാരെ കണ്ടുപിടിക്കുന്നതില് ഒരു അത്ഭുതമാണ് ഈസ്റ്റ് കോസ്റ്റ് വിജയൻ. ഈ സിനിമയിലും പുതുമുഖ നായികമാരും നായകനുമുണ്ട്. എല്ലാവര്ക്കും ഗംഭീര തുടക്കമാകട്ടെ, മലയാള സിനിമാ കുടുംബത്തിലേക്ക് അവരെ സ്വാഗതം ചെയ്യുന്നുവെന്നും ദിലീപ് പറഞ്ഞു. ചിത്രം വന് വിജയമാകട്ടെയെന്നും ദിലീപ് ആശംസിച്ചു. ചടങ്ങിനെത്തിയ അതിഥികളെ സ്വാഗതം ചെയ്തുകൊണ്ട്, ഈസ്റ്റ് കോസ്റ്റ് വിജയന് രചനയില് ഭാവഗായകന് പി.ജയചന്ദ്രന്റെ ആലാപന സൗകുമാര്യത്തില് പിറന്ന ‘ഞാനൊരു മലയാളി’ എന്ന ഗാനത്തിന്റെ പശ്ചാത്തലത്തില് ഒരുക്കിയ ‘ലൈവ് സാന്ഡ് ആര്ട്ട്’ നവ്യാനുഭമായി മാറി. ‘ലൈവ് സാന്ഡ് ആര്ട്ട്’ ഒരുക്കിയ കലാകാരനെ ദിലീപ് വേദിയില് വിളിച്ച് അഭിനന്ദിക്കുകയും ചെയ്തു.
ചടങ്ങില് സംസാരിച്ച സംഗീത സംവിധായകന് എം. ജയചന്ദ്രന് വികാരഭരിതനായി. ഒരു കലാകാരന്റെ ജീവിതം എല്ലാം കൂടിയ ഒന്നാണ്. ഈ ജീവിതത്തില് ഉയര്ച്ചയും താഴ്ചയും ഉണ്ടാവും. അത്തരം ഒരു ഇറക്കം എന്റെ ജീവിതത്തിലും സംഭവിച്ചു. അന്ന് എന്തു ചെയ്യണം എങ്ങോട്ട് പോകണം എന്നറിയാതെ നില്ക്കുന്ന അവസരത്തില് വിജയന് സര് എന്നെ വിളിച്ചു. ‘ഓര്മക്കായ്’ എന്ന ആല്ബത്തിന്റെ സംഗീത സംവിധായകന് താങ്കളാണ് എന്ന് അദ്ദേഹം പറഞ്ഞപ്പോള് കണ്ണ് നിറഞ്ഞുപോയി. ഇപ്പോള് ഞാനിവിടെ സംഗീത സംവിധായകനായി നിങ്ങളുടെ മുന്നില് നില്ക്കുന്നതിന്റെ പ്രധാന കാരണം അദ്ദേഹമാണ്. നന്ദി എന്ന കടപ്പാട് കൊണ്ടൊന്നും ചെയ്തു തന്നതിന് പകരമാവില്ലെന്നും ജയചന്ദ്രന് പറഞ്ഞു.
പത്ത് വര്ഷത്തെ ഇടവേളയ്ക്ക് ശേഷം ഈസ്റ്റ് കോസ്റ്റും സംഗീത സംവിധായകന് എം. ജയചന്ദ്രനും ഒന്നിക്കുന്ന ചിത്രമെന്ന പ്രത്യേകതയും ചില ന്യുജെന് നാട്ടുവിശേഷങ്ങള്ക്കുണ്ട്. ഈസ്റ്റ് കോസ്റ്റ് വിജയന്റെ ചിത്രത്തിലെ പാട്ടുകളെല്ലാം പാട്ടുകള് തന്നെയാണ്. ഇപ്പോഴുള്ള മിക്ക പാട്ടുകളിലും നാല് വരികള്ക്ക് ശേഷം സംഭാഷണങ്ങള് കുത്തി നിറച്ചത് കാണാം. അത്തരം ചില പാട്ടുകള് ഞാന് തന്നെ പാടിയിട്ടുണ്ട്. മനോഹരമായ പാട്ടുകള്ക്ക് നടുവില് സംഭാഷണം വരുമ്പോള് കേള്ക്കാനുള്ള ഇമ്പം നഷ്ടപ്പെടുന്നുവെന്നും ഗായകൻ പി. ജയചന്ദ്രന് പറഞ്ഞു.
ചിരിയുടെ രസക്കൂട്ടില് പ്രണയവും സംഗീതവും ചേരുംപടി ചേര്ത്ത, എല്ലാത്തരം പ്രേക്ഷകരെയും ആകര്ഷിക്കുന്ന, ഒരു റൊമാന്സ്-കോമഡി ഫാമിലി എന്റര്ടെയിനറായിരിക്കും ‘ചില ന്യൂ ജെന് നാട്ടുവിശേഷങ്ങള്’ എന്നാണ് ട്രെയിലര് നല്കുന്ന സൂചന. സുരാജ് വെഞ്ഞാറമൂട്, ഹരീഷ് കണാരന് തുടങ്ങിയവര് കേന്ദ്രകഥാപാത്രങ്ങളാകുന്ന ചിത്രത്തില് പുതുമുഖതാരം അഖില്പ്രഭാകറാണ് നായകന്. ശിവകാമി, സോനു എന്നിവരാണ് ചിത്രത്തിലെ നായികമാര്.
നെടുമുടി വേണു, ദിനേശ് പണിക്കര്, വിനയ് വിജയന്, ജയകൃഷ്ണന്, നോബി, ബിജുക്കുട്ടന്, വിഷ്ണുപ്രിയ, സുബി സുരേഷ്, അഞ്ജലി തുടങ്ങി ഒരു മികച്ച താരനിരയും ചിത്രത്തില് അണിനിരക്കുന്നുണ്ട്. ചിത്രം ജൂലൈ പകുതിയോടെ തിയേറ്ററുകളിലെത്തും.
