ഗുരുവായൂര്‍: പ്രധാനമന്ത്രി നരേന്ദ്രമോദിയ്‌ക്ക് സൗഭാഗ്യം വിളയാടാനായി ഒരു ഭക്തന്‍ ഗുരുവായൂര്‍ ക്ഷേത്രത്തില്‍ ഇന്നലെ നടത്തിയത് ഇതള്‍ വിരിഞ്ഞ മനോഹരമായ താമരപ്പൂക്കള്‍കൊണ്ടുള്ള തുലാഭാരം.
തുലാഭാരത്തിനായി 112 കിലോ താമരപ്പൂക്കളാണ് മുന്നൊരുക്കമെന്ന നിലയില്‍ ഗുരുവായൂര്‍ ക്ഷേത്രത്തിലേക്ക് തലേന്നാള്‍ തന്നെ എത്തിച്ചതെങ്കിലും 91 കിലോയാണ് പ്രധാനമന്ത്രിയ്‌ക്ക് തുലാഭാരത്തിനായി വേണ്ടിവന്നത്. കോയമ്പത്തൂര്‍ ആര്യവൈദ്യശാല ഉടമ പി.ആര്‍. കൃഷ്ണകുമാറിന്റെ വകയായിട്ടായിരുന്നു പ്രധാനമന്ത്രിയ്‌ക്ക് താമരപ്പൂകൊണ്ടുള്ള തുലാഭാരം. ഇദ്ദേഹവും പ്രധാനമന്ത്രിയെ ക്ഷേത്രദര്‍ശനത്തിനായി അനുഗമിച്ചിരുന്നു. വഴിപാടുകാരനായ പി.ആര്‍. കൃഷ്ണകുമാറിനോട് ‘തൃപ്തിയായില്ലേ’യെന്ന് തുലാഭാരത്തട്ടിലിരുന്ന് പ്രധാനമന്ത്രി ചോദിച്ചു. തൊഴുകൈകളോടെ താന്‍ പൂര്‍ണ്ണസംതൃപ്തനാണെന്നും, അതിന് ഭഗവാനോട് നന്ദിയുണ്ടെന്നും കൃഷ്ണകുമാര്‍ പറഞ്ഞു.
തുലാഭാരത്തിനായി വഴിപാടുകാരന്‍ താമരപ്പൂ ക്ഷേത്രത്തിലേയ്‌ക്ക് കൊണ്ടുവന്നതിനാല്‍ തുലാഭാരസംഖ്യയായി തട്ടില്‍പണം മാത്രമേ നല്‍കേണ്ടതുള്ളു. അതുകൊണ്ട് തട്ടില്‍പണമായ നൂറുരൂപ നരേന്ദ്രമോദിയുടെ പേരില്‍ ദേവസ്വത്തിലടച്ചു. നാഗര്‍കോവിലിലെ ശുചീന്ദ്രം ഗ്രാമത്തിലുള്ള ചെറിയ കായലില്‍ നിന്നാണ് താമരപ്പൂ ശേഖരിച്ചത്.
