കാര്‍ഡിഫ്: ലോകകപ്പിന് മുന്നോടിയായി എം.എസ്. ധോണിയുടെയും കെ.എല്‍. രാഹുലിന്റെയും വെടിക്കെട്ട്്. ഇരുവരുടെയും സെഞ്ചുറികളുടെ കരുത്തില്‍ ഇന്ത്യ അവസാന സന്നാഹ മത്സരത്തില്‍ ബംഗ്ലാദേശിനെതിരെ കൂറ്റന്‍ സ്‌കോര്‍ പടുത്തുയര്‍ത്തി. 50 ഓവറില്‍ ഏഴു വിക്കറ്റിന് 359 റണ്‍സ്്.
തുടക്കം മുതല്‍ അടിയുടെ പൂരം തീര്‍ത്ത ധോണി 78 പന്തില്‍ 113 റണ്‍സ് നേടി. എട്ട് ഫോറും ഏഴു സിക്‌സറും ഉള്‍പ്പെട്ട ഇന്നിങ്ങ്‌സ്.
നാലാം നമ്പറില്‍ ബാറ്റിങ്ങിനിറങ്ങിയ രാഹുല്‍ 99 പന്തില്‍ 12 ഫോറും നാല് സിക്‌സറും അടക്കം 108 റണ്‍സ് സ്വന്തം പേരില്‍ കുറിച്ചു. തുടക്കം തകര്‍ന്ന ഇന്ത്യയെ രാഹുലിന്റെയും ധോണിയുടെയും മിന്നല്‍ ബാറ്റിങ്ങാണ് കരകയറ്റിയത്. അഞ്ചാം വിക്കറ്റില്‍ ഇവര്‍ 164 റണ്‍സ് അടിച്ചുകൂട്ടി.
ക്യാപ്റ്റന്‍ വിരാട് കോഹ്‌ലിയും ഭേദപ്പെട്ട പ്രകടനം കാഴ്ചവച്ചു. 46 പന്തില്‍ 47 റണ്‍സ് നേടി. അഞ്ചു പന്ത് അതിര്‍ത്തികടത്തി. ഹാര്‍ദിക് പാണ്ഡ്യ പതിനൊന്ന് പന്തല്‍ 21 റണ്‍സ് എടുത്തു. ജഡേജ നാല് പന്തില്‍ ഒരു സിക്‌സറും ഒരു ഫോറും അടക്കം 11 റണ്‍സുമായി പുറത്താകാതെ നിന്നു. അഞ്ച് പന്തില്‍ ഏഴ് റണ്‍സ് കുറിച്ച കാര്‍ത്തിക്കും പുറത്തായില്ല.
ബാറ്റിങ്ങിനയക്കപ്പെട്ട ഇന്ത്യയുടെ തുടക്കം മോശമായി. ഇംഗ്ലണ്ടില്‍ മികച്ച റെക്കോഡുള്ള ഓപ്പണര്‍ ധവാന്‍ കേവലം ഒരു റണ്‍സുമായി കളിക്കളം വിട്ടു. ആദ്യ വിക്കറ്റ് വീഴുമ്പോള്‍ ഇന്ത്യന്‍ സ്‌കോര്‍ബോര്‍ഡില്‍ അഞ്ചു റണ്‍സ് മാത്രം. രോഹിത് ശര്‍മയും പുറത്തായതോടെ സ്‌കോര്‍ രണ്ടിന് 50 റണ്‍സ്.
ബംഗ്ലാദേശിനുവേണ്ടി റൂബല്‍ ഹുസൈന്‍ എട്ട് ഓവറില്‍ 62 റണ്‍സിന് രണ്ട് വിക്കറ്റ വീഴ്‌ത്തി. ഷാക്കിബ് അല്‍ ഹസന്‍ ആറ് ഓവറില്‍ 58 റണ്‍സ്് വിട്ടുകൊടുത്ത് രണ്ട് പേരെ പുറത്താക്കി. നേരത്തെ ടോസ്് നേടിയ ബംഗ്ലാദേശ് ഫീല്‍ഡിങ് തെരഞ്ഞെടുത്തു.
