ന്യൂദല്ഹി: ഐപിഎല്ലില് നിറം മങ്ങിപ്പോയത് ശരി തന്നെ. പക്ഷെ ലോകകപ്പില് കളി മാറും. പങ്കാളിയായ യുസ്വേന്ദ്ര ചഹലിനൊപ്പം നിര്ണായകമായ നിമിഷങ്ങളില് വിക്കറ്റുകള് വീഴ്ത്തി നായകന് കോഹ്ലിക്ക് ഉറച്ച പിന്തുണ നല്കുമെന്ന് ചൈനാമന് സ്പിന്നില് കുല്ദീപ് യാദവ്.
ചഹലും ഞാനും പരസ്പര ധാണയിലാണ് കളിക്കുന്നത്. ഏകദിനങ്ങളില് മധ്യ ഓവറുകള് നിര്ണായകമാണ്. അതിനാല് കഴിയാവുന്നത്ര വിക്കറ്റുകള് വീഴ്ത്തി റണ് ഒഴുക്ക് തടയും. ഏകദിനങ്ങളില് ഞങ്ങള് മികച്ച പ്രകടനമാണ് കാഴ്ച വയ്ക്കുന്നത്. ലോകകപ്പിലും മിന്നുന്ന പ്രകടനം പ്രതീക്ഷിക്കാം. ഈ ലോകകപ്പില് ഇന്ത്യ കിരീടം നേടുമെന്ന് കുല്ദീപ് പറഞ്ഞു.
നായകന് കോഹ്ലിയും മുന് നായകന് ധോണിയുമാണ് ഇന്ത്യന് ടീമിന്റെ നട്ടെല്ല്. ധോണി ഞങ്ങള്ക്ക് സ്വാതന്ത്രം കോഹ്്ലി ആത്മവിശ്വാസവും നല്കുന്നു. എല്ലാ പ്രശ്നങ്ങള്ക്കും പരിഹാരമാണ് ധോണി. കളിക്കളത്തില് യുവാക്കള്ക്ക് ഉപേദശവും മാര്ഗനിര്ദേശവും ധോണിയില് നിന്ന് ലഭിക്കുമെന്ന് കുല്ദീപ് കൂട്ടിച്ചേര്ത്തു.
കൈക്കുഴ സ്പിന്നര്മാരായ യുസ്വേന്ദ്ര ചഹലും കുല്ദീപ് യാദവും ലോകകപ്പില് ഇന്ത്യയുടെ തുറുപ്പുചീട്ടുകളാണ്. ഇരുവരും ഇതാദ്യമായാണ് ലോകകപ്പില് കളിക്കുന്നത്്.
ചഹലും കുല്ദീപും രാജ്യാന്തര ഏകദിനങ്ങളില് ഇന്ത്യക്ക് മികച്ച സംഭാവന നല്കിയിട്ടുണ്ട്. 2016 ലാണ് ചഹല് രാജ്യാന്തര അരങ്ങേറ്റം കുറിച്ചത്. ഇതുവരെ കളിച്ച 41 ഏകദിനങ്ങളില് ചഹല് 72 വിക്കറ്റുകള് വീഴ്ത്തി. 24.61 ആണ് ശരാശരി. 2017 ലാണ് കുല്ദീപ് രാജ്യാന്ത മത്സരത്തില് അരങ്ങേറിയത്. 44 മത്സരങ്ങളില് 87 വിക്കറ്റുകള് നേടി. 21.74 ആണ് ശരാശരി.
കഴിഞ്ഞ വര്ഷം ഇംഗ്ലണ്ടില് പര്യടനം നടത്തിയ ഇന്ത്യന് ടീമില് കുല്ദീപും ഉണ്ടായിരുന്നു. ഇംഗ്ലണ്ടിനെതിരായ മൂന്ന് മത്സരങ്ങളുടെ ഏകദിന പരമ്പരയില് ഒമ്പത് വിക്കറ്റുകള് വീഴത്തി വിക്കറ്റ് വേട്ടയില് മുന്നിലെത്തി. രണ്ട് ട്വന്റി 20 മത്സരങ്ങളില് അഞ്ച് വിക്കറ്റുകളും സ്വന്തമാക്കി.
ഈ മുപ്പതിനാരംഭിക്കുന്ന ലോകകപ്പില് ഇന്ത്യയുടെ ആദ്യ മത്സരം ജൂണ് അഞ്ചിനാണ്. ദക്ഷിണാഫ്രിക്കയാണ് എതിരാളികള്. സതാംപറ്റണിലെ റോസ് ബൗളിലാണ് മത്സരം.
