കൂത്തുപറമ്പ്(കണ്ണൂര്): മൈസൂരുവിനടുത്ത മാണ്ഡ്യയിലുണ്ടായ വാഹനാപകടത്തില് കൂത്തുപറമ്പ് സ്വദേശികളും ദമ്പതികളുമായ നാലു പേര് മരിച്ചു. കോട്ടയംപൊയില് ഏഴാംമൈല് ശ്രീധരന് മാസ്റ്റര് റോഡില് ഈക്കിലിശേരി വീട്ടില് ജയദീപ് (27), ഭാര്യ ജ്ഞാനതീര്ത്ഥ (25), ഏഴാം മൈല് അഭയം ഹൗസില് കിരണ് അശോക് (27), ഭാര്യ ജിന്സി (24) എന്നിവരാണ് മരിച്ചത്.
ബംഗളൂരുവിലേക്ക് വിനോദയാത്രയ്ക്കായി പോയതായിരുന്നു ഇവര്. വ്യാഴാഴ്ച പുലര്ച്ചെ രണ്ടോടെ മാണ്ഡ്യ മദ്ദൂരിലായിരുന്നു അപകടം. പെട്രോള് പമ്പിന് സമീപം നിര്ത്തിയിട്ട പെട്രോള് ടാങ്കര് ലോറിയുടെ പിന്നില് കാര് ഇടിച്ചുകയറുകയായിരുന്നു.
നാലുപേരും സംഭവസ്ഥലത്തുതന്നെ മരിച്ചു. പ്രകാശന്-ദീപജ ദമ്പതികളുടെ മകനാണ് മരിച്ച ജയദീപ്. സൗദിയില് കപ്പലിലെ ജീവനക്കാരനാണ്. ഒരു വര്ഷം മുമ്പായിരുന്നു വീടിനു സമീപം തന്നെ താമസക്കാരായ വത്സന്-പ്രജിത ദമ്പതികളുടെ മകളായ ജ്ഞാനതീര്ത്ഥയുമായുള്ള ജയദീപിന്റെ വിവാഹം.
ഏഴാംമൈലിലെ പ്രകാശന്-ഭാര്ഗവി ദമ്പതികളുടെ മകനാണ് മരിച്ച കിരണ് അശോക്. ഫോട്ടോഗ്രാഫറാണ്. ഒരു മാസം മുമ്പായിരുന്നു ചൊക്ലി പെരിയാണ്ടി സ്കൂളിനു സമീപം രാജന്-സജിത ദമ്പതികളുടെ മകളായ ജിന്സിയുമായുള്ള കിരണിന്റെ വിവാഹം. ചൊക്ലി യുപി സ്കൂള് അധ്യാപികയാണ് ജിന്സി.
കൗശല് അശോക് ആണ് കിരണിന്റെ സഹോദരന്. ജിജിന (അമേരിക്ക), കുക്കു എന്നിവര് മരിച്ച ജിന്സിയുടെ സഹോദരങ്ങളാണ്. ചൊവ്വാഴ്ച വൈകുന്നേരമാണ് ഇവര് വിനോദയാത്രയ്ക്ക് പുറപ്പെട്ടത്. മദ്ദൂര് സര്ക്കാര് ആശുപത്രിയില് പോസ്റ്റുമോര്ട്ടം നടത്തിയ മൃതദേഹം ബന്ധുക്കളെത്തി നാട്ടിലേക്ക് കൊണ്ടുപോയി.
