പന്ത് ചുരണ്ടല് വിവാദവും നാണക്കേടുമായി തോല്വികളുടെ പരമ്പര തീര്ത്ത ഓസ്ട്രേലിയയ്ക്ക് ഇത് പുത്തന് ഉണര്വിന്റെ കാലം. രണ്ടു മാസം മുമ്പു വരെ ക്രിക്കറ്റ് നിരീക്ഷകരുടെ കണക്കു പുസ്തകത്തില് നിലവിലെ ജേതാക്കള്ക്ക് സ്ഥാനമില്ലായിരുന്നു. ഇന്ത്യയിലെ പരമ്പരിയില് ആതിഥേയരെ മലര്ത്തിയടിച്ച് ഏകദിനത്തിലെ ചക്രവര്ത്തിപദം തുടരാനുള്ള തയാറെടുപ്പിലാണ് കംഗാരു.
ഇന്ത്യയെ കീഴടക്കിയതോടെ പുത്തന് ഉണര്വിലാണ് ഓസീസ്. ടീമില് പല താരങ്ങളും അവസരത്തിനൊത്തുയര്ന്നു. ഉസ്മാന് ഖവാജയെപ്പോലുള്ള താരങ്ങള് നിര്ണായക മത്സരങ്ങളില് റണ്സ് കണ്ടെത്തി. തോല്വികളില് ആടിയുലഞ്ഞ ഓസീസ് ടീം പഴയ പ്രതാപത്തിലേക്ക് കൈപിടിച്ച് ഉയര്ന്നു. ഒട്ടും സ്റ്റീവ് സ്മിത്തിന്റെയും ഡേവിഡ് വാര്ണറുടെയും അഭാവത്തില് നേടിയ വിജയം ഓസീസിന് പുത്തന് ഉണര്വ് നല്കി.
ലോകകപ്പില് ഇന്ന് വലിയ പ്രതീക്ഷകള് ഓസീസ് ടീമിനുണ്ട്. ബാറ്റിങ്ങും ബൗളിങ്ങും ഒരുപോലെ താളം കണ്ടെത്തി. സ്മിത്തിന്റെയും വാര്ണറുടെയും വരവോടെ ബാറ്റിങ് കൂടുതല് ശക്തിപ്പെട്ടു. മുന്നിര ബാറ്റ്സ്മാന്മാരില് ആരെ കളിപ്പിക്കണമെന്ന സംശയത്തിലാണ് ഓസീസ്. വാര്ണര്, സ്മിത്ത്, ഫിഞ്ച്, ഖവാജ, മാര്ഷ് എന്നിവരെല്ലാം ഫോമില്. നായകന് ഫിഞ്ചിനൊപ്പം ഡേവിഡ് വാര്ണര് ഓപ്പണറാകും. ഐപിഎല്ലിലെ മിന്നും ഫോം വാര്ണര് ലോകകപ്പിലും തുടര്ന്നാല് ഓസ്ട്രേലിയയ്ക്ക് കാര്യങ്ങള് എളുപ്പമാകും. മധ്യനിരയില് സ്റ്റീവ് സ്മിത്ത്, ഷോണ് മാര്ഷ് എന്നിവര്ക്കൊപ്പം ഉസ്മന് ഖവാജയും സ്ഥാനം കണ്ടെത്തിയേക്കും. അലക്സ് കാരിയാകും വിക്കറ്റ് കീപ്പര്. തകര്ത്തടിക്കാന് കെല്പ്പുള്ള ഗ്ലന് മാക്സ്വെല്ലും മാര്കസ് സ്റ്റോയ്നിസും അവസാന ഓവറുകളില് ഓസീസിന് ആശ്വാസമാകും.
മിച്ചല് സ്റ്റാര്ക്ക് നയിക്കുന്ന ബൗളിങ് നിരയില് പരിചയസമ്പന്നരായി പാറ്റ് കമ്മിന്സ്, നഥാന് കോള്ട്ടര്നൈല് എന്നിവര് പന്തെറിയാനെത്തും. ആദം സാമ്പ, നഥാന് ലിയോണ് സഖ്യമാകും സ്പിന്നിരയെ നയിക്കുക. കഴിഞ്ഞ ലോകകപ്പില് ഓസ്ട്രേലിയയെ കിരീടത്തിലെത്തിക്കുന്നതില് പ്രധാന പങ്ക് വഹിച്ച സ്റ്റാര്ക്ക് ഇത്തവണയും തിളങ്ങുമെന്ന പ്രതീക്ഷയിലാണ് ഫിഞ്ചും സംഘവും.
ഓസീസ് ടീം: ആരോണ് ഫിഞ്ച് (നായകന്), ഡേവിഡ് വാര്ണര്, സ്റ്റീവ് സ്മിത്ത്, ഉസ്മന് ഖവാജ, ഷോണ് മാര്ഷ്, ഗ്ലെന് മാക്സ്വെല്, മാര്ക്കസ് സ്റ്റോയ്നിസ്, അലക്സ് കാരി, കെയ്ന് റിച്ചാര്ഡ്സണ്, പാറ്റ് കമ്മിന്സ്, മിച്ചല് സ്റ്റാര്ക്ക്, നഥാന് കോള്ട്ടര്നൈല്, ജെയ്സണ് ബെഹ്റെന്ഡോര്ഫ്, ആദം സാമ്പ, നഥാന് ലിയോണ്.
