മ്യൂണിക്ക്: ജര്മന് ഫുട്ബോൡലെ അധീശത്വം ബയേണ് മ്യൂണിക്ക് അരക്കിട്ടുറപ്പിച്ചു. ബുണ്ടസ് ലിഗയില് തുടക്കത്തില് ഏറെ പിന്നിലായിട്ടും രണ്ടാം പാദത്തിലെ തുടര് വിജയങ്ങളിലൂടെ തുടരെ ഏഴാം കിരീടം അവര് സ്വന്തമാക്കി. ക്ലബ്ബിന്റെ സൂപ്പര്താരങ്ങളായ ആര്യന് റോബനും ഫ്രാങ്ക് റിബറിക്കും സ്വപ്നസമാനമായ യാത്രയയപ്പ് നല്കാനും ടീമിനായി. ബയേണിന്റെ 29ാം കിരീടമാണിത്.
അവസാന മത്സരം വരെ ആവേശം നിറഞ്ഞ ലീഗില് നിത്യവൈരികളായ ബൊറൂസിയ ഡോര്ട്ട്മുണ്ടിനെ രണ്ട് പോയിന്റ് വ്യത്യാസത്തില് മറികടന്ന് ബയേണിന്റെ നേട്ടം. അവസാന കളിയില് എയന്ട്രാക്ട് ഫ്രാങ്ക്ഫര്ട്ടിനെ ഒന്നിനെതിരെ അഞ്ചു ഗോളിന് മ്യൂണിക്കിലെ ചെമ്പട മുക്കി. മോണ്ചെംഗ്ലാദ്ബാദിനെ മടക്കമില്ലാത്ത രണ്ടു ഗോളിന് കീഴടക്കിയെങ്കിലും ബയേണിനെ മറികടക്കാനുള്ള പോയിന്റ് ബൊറൂസിയയ്ക്കുണ്ടായിരുന്നില്ല. 34 കളികളില് ബയേണിന് 78 പോയിന്റ്, ബൊറൂസിയയ്ക്ക് 76 പോയിന്റ്.
തുടക്കത്തില് ബൊറൂസിയയോട് 12 പോയിന്റിന് പിന്നിലായിരുന്ന ടീമാണ് അവരെ രണ്ട് പോയിന്റ് വ്യത്യാസത്തില് മറികടന്നത്. നേട്ടം പരിശീലകന് നികൊ കൊവാക്കിനും ആശ്വാസമായി. തലയില് തൂങ്ങിയ വാള്മുനയില് നിന്നൊരു താത്കാലിക രക്ഷ. ഇരട്ടക്കിരീടം ലക്ഷ്യമിട്ട് അടുത്തയാഴ്ച ജര്മന് കപ്പ് ഫുട്ബോള് ഫൈനലിനിറങ്ങും ബയേണ്.
കിരീട നേട്ടത്തില് ആഹ്ലാദം പ്രകടിപ്പിച്ച ബയേണ് പരിശീലകന് നികൊ കൊവാക്ക് റോബനെയും റിബറിയെയും പുകഴ്ത്തി. ടീം കെട്ടിപ്പടുക്കുന്നതില് അവരുടെ പങ്ക് നിര്ണായകമായിരുന്നെന്ന് അദ്ദേഹം പറഞ്ഞു. ബുണ്ടസ് ലിഗയിലെ 22 സീസണുകളില് ബയേണിനായി ബൂട്ടണിഞ്ഞ റോബന്-റിബറിമാരുടെ ബൂട്ടില് നിന്ന് 185 ഗോളുകള് പിറന്നു. 15 തവണ ലീഗ് കിരീടവും സ്വന്തമാക്കി.
റയലില് നിന്ന് 2009ല് ബയേണിലെത്തിയ ഡച്ച് വിങ്ങര് ആര്യന് റോബന് 201 മത്സരങ്ങളില് നിന്ന് 99 ഗോള് നേടി. എട്ട് തവണ ലീഗ് കിരീടം സ്വന്തമാക്കി. ഫ്രഞ്ച് ടീം മാഴ്സെയില് നിന്ന് 2007ല് മ്യൂണിക്കിലെത്തിയ ഫ്രഞ്ചാ താരം ഫ്രാങ്ക് റിബറിയുടെ ഒമ്പതാം കിരീടമാണിത്. ആദ്യമായാണ് ലീഗില് ഒരു താരം ഒമ്പത് കിരീടനേട്ടത്തില് പങ്കാളിയാകുന്നത്. ബയേണിനായി 273 കളിയില് 86 ഗോളും താരം നേടി. ചാമ്പ്യന്സ് ലീഗ് കിരീടനേട്ടത്തിലും ഇരവരും പങ്കാളികളായി.
