തിരുവനന്തപുരം: ഗുജറാത്തിലെ ഉരുളക്കിഴങ്ങ് കർഷകർക്ക് എതിരെ കേസ് കൊടുത്ത ബഹിരാഷ്ട്ര കുത്തകയായ പെപ്സി കമ്പനിയുടെ ഉത്പന്നങ്ങൾ ബഹിഷ്കരിക്കണമെന്ന ആഹ്വാനവുമായി സ്വദേശി ജാഗരൺ മഞ്ച്.
വിപണിയിൽ കിട്ടിയ വിത്തുപയോഗിച്ച് കൃഷി ചെയ്ത കർഷകർക്കെതിരെ കോടികൾ നഷ്ടപരിഹാരത്തുക ആവശ്യപ്പെട്ട് നൽകിയ കേസ് കർഷകരുടെ അവകാശത്തിൻ മേലുള്ള ബഹുരാഷ്ട്ര കുത്തകകളുടെ കടന്നു കയറ്റമായെ കാണാൻ കഴിയു, സ്വദേശി ജാഗരൺ മഞ്ച് സംസ്ഥാന കൺവീനർ രജ്ജിത്ത് കാർത്തികേയൻ പ്രസ്താവനയിൽ പറഞ്ഞു. പ്രശ്നത്തിൽ അടിയന്തരമായി കേന്ദ്രസർക്കാർ ഇടപെടണമെന്ന് അദ്ദേഹം ആവശ്യപ്പെട്ടു.
പെപ്സിയുടെ കർഷക വിരുദ്ധ നടപടികൾക്കെതിരെ ദേശിയ വ്യാപകമായി പ്രക്ഷോഭ പരിപാടികൾക്ക് ഉടൻ രുപം നൽകുമെന്നും കാർത്തികേയൻ പറഞ്ഞു. സബർകന്ദ, ആരവല്ലി ജില്ലകളിലെ കർഷകർ ഒരു കോടിയിലേറെ രൂപ വീതം നഷ്ടപരിഹാരം വേണം എന്നാവശ്യപ്പെട്ടാണ് ഈ മാസം ആദ്യം പെപ്സികോ കേസ് നൽകിയത്.
2001ലെ പ്രൊട്ടക്ഷൻ ഓഫ് പ്ലാന്റ് വെറൈറ്റീസ് ആന്റ് ഫാർമേഴ്സ് റൈറ്റ് ആക്ട് പ്രകാരം FL2027 എന്നയിനം ഉരുളക്കിഴങ്ങ് കൃഷി ചെയ്യാൻ പെപ്സികോ കമ്പനിക്ക് മാത്രമേ അവകാശമുള്ളൂ എന്ന് കാണിച്ചാണ് നിയമനടപടി.
പ്രൊട്ടക്ഷൻ ഓഫ് പ്ലാന്റ് വെറൈറ്റീസ് ആന്റ് ഫാർമേഴ്സ് റൈറ്റ് അതോറിറ്റി ഇക്കാര്യത്തിൽ കർഷകർക്ക് അനുകൂലമായ അടിയന്തിര നടപടി സ്വീകരിക്കണം. പ്ലാന്റ് വെറൈറ്റീസിന് ബൗദ്ധിക സ്വത്തവകാശം നൽകുന്ന നയം പുനപരിശോധിക്കണം, അദ്ദേഹം പ്രസ്താവനയിൽ ആവശ്യപ്പെട്ടു.
