ന്യൂദല്ഹി: ബാങ്കുകളില് നിന്ന് വായ്പയെടുത്ത് മുങ്ങിയവരെക്കുറിച്ചുള്ള വിവരങ്ങള് പുറത്തുവിടണമെന്ന് റിസര്വ് ബാങ്കിനോട് സുപ്രീംകോടതി. വിവരാവകാശ നിയമപ്രകാരം ആവശ്യപ്പെട്ടാല് ഈ വിവരങ്ങള് വെളിപ്പെടുത്തണമെന്നും ബാങ്കുകളിലെ വാര്ഷിക പരിശോധനാ റിപ്പോര്ട്ടുകളും വിവരാവകാശ നിയമപ്രകാരം നല്കണമെന്നും കോടതി നിര്ദേശിച്ചു.
ജസ്റ്റിസ് എല്. നാഗേശ്വര റാവു അധ്യക്ഷനായ ബെഞ്ചിന്റേതാണ് ഉത്തരവ്. വിവരങ്ങള് രഹസ്യമാക്കി വയ്ക്കുന്ന ആര്ബിഐ നയത്തെയും കോടതി വിമര്ശിച്ചു. ഈ നയം മാറ്റണം, കോടതി നിര്ദേശിച്ചു. എസ്.സി. അഗര്വാള് എന്ന സാമൂഹ്യപ്രവര്ത്തകനാണ് ഈ വിഷയവുമായി കോടതിയെ സമീപിച്ചത്. ബാങ്കുകളുടെ വാര്ഷിക റിപ്പോര്ട്ട് വിവരാവകാശ പ്രകാരം നല്കാന് ആര്ബിഐ വിസമ്മതിച്ചതു ചൂണ്ടിക്കാട്ടി അഗര്വാള് കോടതിയെ സമീപിച്ചിരുന്നു.
കോടതി ആവശ്യപ്പെട്ടിട്ടും ഇത് ആര്ബിഐ പരിഗണിച്ചില്ല. തുടര്ന്ന് ജനുവരിയില് സുപ്രീംകോടതി ആര്ബിഐക്കെതിരെ കോടതിയലക്ഷ്യത്തിന് നോട്ടീസ് അയച്ചിരുന്നു. അതിന് ശേഷവും നടപടി ഉണ്ടാകാത്തതോടെയാണ് കോടതിയുടെ അന്ത്യശാസനം.
