തിരുവനന്തപുരം: സുപ്രീംകോടതി വിധിയുടെ പേരു പറഞ്ഞ് ശബരിമലയോടും ബിജെപി, ആർഎസ്എസ് പ്രവർത്തകരോടും നീതികേട് കാണിക്കരുതെന്ന് ബിജെപി ദേശീയ അധ്യക്ഷൻ അമിത് ഷാ. ശബരിമലയുടെ പേര് പറഞ്ഞ് ഞങ്ങളാരും വോട്ട് ചോദിക്കില്ല. പക്ഷേ, അതിന്റെ പേരിൽ വിശ്വാസികളോട് കാട്ടുന്ന അനീതി തുറന്നുകാണിക്കുക തന്നെ ചെയ്യുമെന്നും അമിത് ഷാ വ്യക്തമാക്കി.
ശബരിമല കോടിക്കണക്കിന് വിശ്വാസികളെ പ്രയാസപെടുത്തുന്ന ഒരു വിഷയമാണ്. എത്രയോ സുപ്രീംകോടതി വിധികൾ നടപ്പാക്കാത്തതുണ്ട്. മസ്ജിദുകളിൽ മൈക്ക് വിലക്കിയ വിധി നടപ്പാക്കാൻ പിണറായി സർക്കാരിന് ധൈര്യമുണ്ടോ. അങ്ങനെ ചെയ്താൽ വോട്ട് ബാങ്ക് തകരും. എന്നാൽ ശബരിമലയുടെ കാര്യം വന്നപ്പോൾ ഇരട്ടത്താപ്പ്. ഇതിന് മുഖ്യമന്ത്രി പിണറായി വിജയൻ ഉത്തരം പറഞ്ഞേ മതിയാകൂവെന്നും അമിത് ഷാ പറഞ്ഞു.
ശബരിമല കേസിൽ സുപ്രീംകോടതി എല്ലാ വശങ്ങളും പരിശോധിച്ച് നീതിപൂർവകമായ ഒരു തീരുമാനത്തിലെത്തുമെന്നാണ് ബിജെപി കരുതുന്നത്. കോടതി തീരുമാനം വന്ന ശേഷം ഓർഡിനൻസിനെക്കുറിച്ച് ചിന്തിക്കാമെന്നും അമിത് ഷാ പറഞ്ഞു.
