ജലന്ധര്‍: സ്രോതസ്സില്ലാത്ത കോടികള്‍ കണ്ടെടുത്ത സംഭവത്തില്‍ കോണ്‍ഗ്രസ് ഭരണത്തിലിരിക്കുന്ന പഞ്ചാബിലെ പോലീസിനെതിരെ പാതിരിമാര്‍ രംഗത്ത്. പിടിച്ചെടുത്ത പണത്തില്‍ ആറുകോടിയോളം രൂപ പോലീസ് മുക്കിയെന്നാണ് ആരോപണം. മുഴുവന്‍ പണവും പഞ്ചാബ് പോലീസ് ആദായ നികുതി വകുപ്പിന് നല്‍കിയില്ലെന്ന് ജലന്ധര്‍ രൂപതയിലെ ഫാ. ആന്റണി മാടശ്ശേരി ആരോപിച്ചു.
ഇക്കാര്യം ഉന്നയിച്ച് പഞ്ചാബ് സര്‍ക്കാരിന് സഭ പരാതി നല്‍കിയെങ്കിലും നടപടി വൈകുകയാണെന്നും പാതിരിമാര്‍ക്ക് ആക്ഷേപമുണ്ട്. എന്നാല്‍ കണ്ടെത്തിയ പണത്തിന്റെ സ്രോതസ്സ് ഇനിയും വെളിപ്പെടുത്താന്‍ തയാറാവാത്ത ഫാ. ആന്റണി മാടശ്ശേരിയുടെ നടപടിയും വിവാദമായി. ഒന്‍പത് കോടി 66 ലക്ഷം രൂപയാണ് ഫാ. മാടശ്ശേരിയില്‍ നിന്ന് പോലീസും ആദായനികുതി വകുപ്പും കണ്ടെടുത്തതെന്നാണ് ആദായനികുതി വകുപ്പിന്റെ രേഖകള്‍.
ഇതിന്റെ സ്രോതസ്സ് കാണിക്കാന്‍ തയാറാവാത്ത ഫാ. മാടശ്ശേരി പോലീസ് പണം തട്ടിയെടുത്തെന്ന ആരോപണവുമായി രംഗത്തെത്തിയത് പഞ്ചാബ് സര്‍ക്കാരിനും തലവേദനയായി. പതിനാറ് കോടി രൂപയാണ് പോലീസും എന്‍ഫോഴ്‌സ്‌മെന്റും ചേര്‍ന്ന് പിടിച്ചെടുത്തതെന്നാണ് പാതിരിമാര്‍ പറയുന്നത്. ഫാ. മാടശ്ശേരിയും മറ്റു മൂന്നു പാതിരിമാരും ചേര്‍ന്ന് സ്വകാര്യ കമ്പനിയെന്ന നിലയില്‍ നടത്തിയ സഹോദയ എന്ന സ്ഥാപനത്തിന്റെ പേരിലുള്ള പണമാണ് പോലീസ് പിടികൂടിയതെന്നാണ് പറയുന്നത്.
കള്ളപ്പണം വെളുപ്പിക്കാനായി സഹോദയയെയും നവജീവന്‍ എന്ന ട്രസ്റ്റിനെയും മറയാക്കി പിടിച്ചിട്ടുണ്ടാവും എന്ന സംശയത്തിലാണ് പോലീസ്. എന്നാല്‍ പോലീസ് ആറുകോടി രൂപ തട്ടിയെടുത്തെന്നും ഖന്ന എസ്പിക്കെതിരെ സിബിഐ അന്വേഷണം വേണമെന്നുമാണ് പാതിരിമാരുടെ ആവശ്യം. ജലന്ധര്‍ രൂപത ഇക്കാര്യത്തില്‍ ഇതുവരെ ഔദ്യോഗികമായ നിലപാട് വ്യക്തമാക്കിയിട്ടില്ല.
