ന്യൂദല്ഹി: കേരളത്തില് 2039 കോടിയുടെ അഞ്ചു ദേശീയ പാതാ വികസന പദ്ധതികള്ക്കു കേന്ദ്രാംഗീകാരം. കേന്ദ്ര റോഡ് ഗതാഗത മന്ത്രി നിതിന് ഗഡ്കരിയുമായുള്ള പൊതുമരാമത്ത് മന്ത്രി പി.കെ. ബഷീന്റെ ചര്ച്ചയിലാണ് തീരുമാനമായത്. ശബരിമല, മൂന്നാര്, വയനാട് എന്നിവിടങ്ങളില് റോപ് വേ നിര്മിക്കാനും തത്വത്തില് അംഗീകാരമായി.
കൊല്ലം-തേനി ദേശീയ പാതയില് കടവൂര് മുതല് ചെങ്ങന്നൂര് ആഞ്ഞിലിമൂട് വരെ നാലുവരിപ്പാതാ വികസനത്തിന് 1663 കോടി, വയനാട് പെരിക്കല്ലൂരില് നിന്നു കര്ണാടകയിലെ ബൈരക്കുപ്പയിലേക്ക് കബനീ നദിക്കു കുറുകെ പാലവും അപ്രോച്ച് റോഡും നിര്മിക്കാന് 40 കോടി, ദേശീയ പാത 744ല് കൊല്ലം-തിരുമംഗലം നിലവിലുള്ള പാതയ്ക്ക് 98.40 കോടി, ദേശീയ പാത 966ല് കോഴിക്കോട് മുതല് പാലക്കാട് വരെയുള്ള പാതയ്ക്ക് 172 കോടി രൂപ, ദേശീയ പാത 66ല് തിരുവനന്തപുരം കഴക്കൂട്ടം മുതല് ബാലരാമപുരം വരെയുള്ള പഴയ പാതയ്ക്ക് 66 കോടി എന്നിങ്ങനെയാണ് തുക. ഭൂമിയേറ്റെടുക്കല് അവസാന ഘട്ടത്തിലുള്ള കോഴിക്കോട്-പാലക്കാട് പുതിയ ഗ്രീന്ഫീല്ഡ് ദേശീയ പാതയുടെ നിര്മാണം ഉടന് ആരംഭിക്കാനും ധാരണയായി.
ശബരിമല, മൂന്നാര്, വയനാട് എന്നിവിടങ്ങളില് റോപ് വേ നിര്മിക്കാന് തത്വത്തില് അംഗീകാരമായി. ശബരിമലയുടെ ഡിപിആര് ഉടന് തയാറാക്കും. ദേശീയ പാത 185ല് അടിമാലി-കുമളി പാതയുടെ വീതി കൂട്ടാന് അനുമതി നല്കും. കൊടുങ്ങല്ലൂര്-അങ്കമാലി ബൈപ്പാസ് അലൈന്മെന്റ് ലഭ്യമാകും. വെല്ലിങ്ടണ് ഐലന്ഡ്-കുണ്ടന്നൂര് ബൈപ്പാസിനെ അരൂര്-അങ്കമാലി ബൈപ്പാസുമായി ബന്ധിപ്പിക്കും. കോതമംഗലം-മൂവാറ്റുപുഴ ബൈപ്പാസുകളുടെ പുതുക്കിയ അലൈന്മെന്റ് അംഗീകാരം മൂന്നു മാസത്തിനകം. കോഴിക്കോട് രാമനാട്ടുകര മുതല് കോഴിക്കോട് വിമാനത്താവളം വരെ എലിവേറ്റഡ് ഹൈവേ പദ്ധതിക്കു കേന്ദ്രം നിര്ദേശം നല്കി. പൊതുമരാമത്ത് സെക്രട്ടറി അദീല അബ്ദുള്ള, പൊതുമരാമത്ത് അഡീഷണല് സെക്രട്ടറി വി.ആര്. വിനോദ്, ചീഫ് എന്ജിനീയര് ഐസക് വര്ഗീസ് എന്നിവരും പൊതുമരാമത്ത് ഉന്നതോദ്യോഗസ്ഥരും ചര്ച്ചയില് പങ്കെടുത്തു.
ജന്മഭൂമി ഓണ്ലൈന്