ന്യൂദല്ഹി : ലോക്സഭാ തെരഞ്ഞെടുപ്പ് പ്രഖ്യാപിച്ച സാഹചര്യത്തില് പ്രചാരണത്തിന്റെ ക്രമക്കേടുകള് അറിയിക്കുന്നതിനായി തെരഞ്ഞെടുപ്പ് കമ്മീഷന് മൊബൈല് ആപ്ലിക്കേഷന് പുറത്തിറക്കി. സി വിജില് എന്ന പേരിലുള്ള ഈ ആപ്പ് വഴി തെരഞ്ഞെടുപ്പ് പെുമാറ്റ ചട്ടങ്ങള് ലംഘിക്കുന്നത് അടക്കമുള്ള വിഷയങ്ങള് പൊതുജനങ്ങള്ക്ക് ഇനി കമ്മിഷനെ അറിയിക്കാം.
ആപ്പിലൂടെ തെരഞ്ഞെടുപ്പ് പെരുമാറ്റ ചട്ടം ലംഘിക്കുന്ന ഫോട്ടോകളും വീഡിയോകളും തെരഞ്ഞെടുപ്പ് കമ്മിഷന് അയച്ചുകൊടുക്കാം. പരാതിയോ, ഫോട്ടോയോ വീഡിയോയോ ഈ ആപ്പലൂടെ കമ്മിഷന് അയയ്ക്കുമ്പോള് മൊബൈലിന്റെ ലൊക്കേഷന് കണ്ടുപിടിച്ച് അധികൃതര് ഇത് രേഖപ്പെടുത്തി വെയ്ക്കുന്നതാണ്. പരാതി അയയ്ക്കുമ്പോള് തന്നെ ഒരു ഏകീകൃത നമ്പര് ലഭിക്കുന്നതാണ്. ഇതിലൂടെ നല്കിയ പരാതിയുടെ തുടര് നടപടികള് അറിയിക്കാനും സാധിക്കും. പരാതി ലഭിച്ചാല് 100 മിനുട്ടിനുള്ളില് പരിഹാരം കാണുമെന്നാണ് കമ്മിഷന് അറിയിച്ചിരിക്കുന്നത്.
രാഷ്ട്രീയ പാര്ട്ടികള് തമ്മിലുള്ള വൈരാഗ്യം തീര്ക്കുന്നതിനായി ഈ ആപ്പ് ദുരുപയോഗം ചെയ്യാന് സാധ്യതയുണ്ട്. അതിനാല് ഇത്തരം സാധ്യതകള് ഒഴിവാക്കുന്നതിനായി മുമ്പ് റെക്കോര്ഡ് ചെയ്ത ഫോട്ടോകളോ, വീഡിയോയോ കമ്മിഷന് സമര്പ്പിക്കാന് സാധിക്കില്ല. ദൃശ്യങ്ങള് പകര്ത്തി അഞ്ച് മിനുട്ടിനുള്ളില് പരാതി നല്കിയിരിക്കണം.
