ന്യൂദല്ഹി: ജെയ്ഷ് ഇ മുഹമ്മദ് ഭീകരസംഘടനയാണെന്നും ഇന്ത്യക്കെതിരെ ആക്രമണം നടത്താന് പാക്കിസ്ഥാന് രഹസ്യാന്വേഷണ വിഭാഗം ഇവരെ ഉപയോഗിച്ചിട്ടുണ്ടെന്നും മുന് പാക് പ്രസിഡന്റ് പര്വേസ് മുഷറഫ്. പാക് വാര്ത്താ ചാനലിനോട് നടത്തിയ ടെലിഫോണ് അഭിമുഖത്തിലാണ് മുഷറഫ് ഇക്കാര്യം വെളിപ്പെടുത്തിയത്.
ജെയ്ഷെയ്ക്കെതിരായ നടപടിയേയും മുഷറഫ് സ്വാഗതം ചെയ്തു. തന്നെ 2003 ഡിസംബറില് രണ്ടു തവണ ജെയ്ഷെ വധിക്കാന് ശ്രമിച്ചതായും അദ്ദേഹം ആരോപിച്ചു. എന്തുകൊണ്ടാണ് അന്ന് ജെയ്ഷെയ്ക്കെതിരെ നടപടി എടുക്കാതിരുന്നതെന്ന മാധ്യമ പ്രവര്ത്തകന്റെ ചോദ്യത്തിന് അന്നത്തെ കാലം വ്യത്യസ്തമായിരുന്നെന്ന മറുപടിയാണ് മുഷറഫ് നല്കിയത്.
ആ സമയത്ത് ഇന്ത്യയും പാക്കിസ്ഥാനും കനത്ത പോരാട്ടം നടത്തുകയായിരുന്നു. ഇരു രാജ്യങ്ങളും മറുരാജ്യത്ത് ബോംബാക്രമണം നടത്താന് ആളുകളെ ഏര്പ്പാടാക്കിയിരുന്നു. തന്റെ രാജ്യത്തെ രഹസ്യന്വേഷണ ഏജന്സികളും ഇത്തരത്തില് മറ്റുള്ളവരെ ഉപയോഗിച്ച് ഇത് നടത്തിയിരുന്നു. അത് കൊണ്ട് തന്നെ ജെയ്ഷെക്കെതിരെ അന്ന് ശക്തമായ നടപടിയൊന്നും എടുത്തില്ലെന്നും അദ്ദേഹം പറഞ്ഞു.
