ബെംഗളൂരു: മാണ്ഡ്യ ലോക്സഭാ സീറ്റിനെ ചൊല്ലി സഖ്യ കക്ഷികളായ കോണ്ഗ്രസിലും ജെഡിഎസിലും പോര് മുറുകി. മാണ്ഡ്യയില് താനാകും ജെഡിഎസിന്റെ സ്ഥാനാര്ത്ഥിയെന്ന് മുഖ്യമന്ത്രി എച്ച്.ഡി.കുമാരസ്വാമിയുടെ മകന് നിഖില് ഗൗഡ മാധ്യമ പ്രവര്ത്തകരുടെ ചോദ്യത്തിന് മറുപടിയായി പറഞ്ഞു.
മണ്ഡലത്തില് മത്സരിക്കുമെന്ന് നേരത്തെ പ്രഖ്യാപിച്ച ചലച്ചിത്രതാരവും കോണ്ഗ്രസ് മന്ത്രിയുമായിരുന്ന അന്തരിച്ച കോണ്ഗ്രസ് നേതാവ് അംബരീഷിന്റെ ഭാര്യ സുമലത പിന്മാറില്ലെന്ന് ഇന്നലെ ആവര്ത്തിച്ചു. ഇതോടെ മാണ്ഡ്യ സീറ്റിനെ ചൊല്ലി ജെഡിഎസ്-കോണ്ഗ്രസ് സഖ്യത്തില് പോര് മുറുകി. സഖ്യത്തിന്റെ നിലനില്പ്പ് പോലും മാണ്ഡ്യ സീറ്റിലെ തീരുമാനത്തെ ആശ്രയിക്കുന്ന ഘട്ടത്തിലേക്ക് എത്തിയിരിക്കുന്നു.
മാണ്ഡ്യ ജില്ലയില് മധൂരില് ഇന്നലെ രാവിലെ ഉണ്ടായ ബസ് അപകടത്തില് 50 പേര്ക്ക് പരിക്കേറ്റിരുന്നു. ഇവരെ സന്ദര്ശിച്ച് ആശുപത്രിയില് എത്തിയ ശേഷമായിരുന്നു നിഖിലിന്റെ പ്രതികരണം. ജെഡിഎസ് ദേശീയ അധ്യക്ഷന് എച്ച്.ഡി.ദേവഗൗഡയും സംസ്ഥാന നേതാക്കളും മാണ്ഡ്യ സീറ്റില് മത്സരിക്കാന് അവശ്യപ്പെട്ടിട്ടുണ്ട്. ഞാന് ഇവിടുത്തെ ജനങ്ങളെ സേവിക്കാന് തയാറാണ്.
സുമതല മാണ്ഡ്യയില് മത്സരിക്കുന്നതിനെചൊല്ലി ചോദിച്ചപ്പോള് താന് എക്കാലവും ബഹുമാനിക്കുന്നവരാണ് സുമലതയും അവരുടെ ഭര്ത്താവ് അംബരീഷെന്നും നിഖില് ഗൗഡ പറഞ്ഞു. അതിനാല് സുമലതയ്ക്കെതിരെ താന് ഒരു പരാമര്ശവും നടത്തില്ല. സുമലതയെ സന്ദര്ശിച്ച് സംസാരിക്കും. സുമലതയുടെ മകന് അഭിഷേക് തന്റെ സഹോദരനെ പോലെയാണ്. കുരുക്ഷേത്ര സിനിമയുടെ ചിത്രീകരണ വേളയില് താന് അംബരീഷിനൊപ്പം ഏറെ സമയം ചിലവഴിച്ചിട്ടുണ്ടെന്നും നിഖില് പറഞ്ഞു.
ഇതിനിടയില് മാണ്ഡ്യയിലെ ജനങ്ങള് നിഖില് മത്സരിക്കണമെന്ന് ആവശ്യപ്പെടുന്നതായി എച്ച്.ഡി.ദേവഗൗഡ മംഗളൂരുവില് പറഞ്ഞു. മാണ്ഡ്യയും ഹസനും എല്ലായിപ്പോഴും ജെഡിഎസിന്റെ സീറ്റാണ്. അതിനാല് ഒരു സാഹചര്യത്തിലും ഈ രണ്ട് സീറ്റിലും ജെഡിഎസ് സ്ഥാനാര്ത്ഥികള് മത്സരിക്കാതിരിക്കില്ല. നിഖില് കൂടി മത്സര രംഗത്ത് ഉറപ്പായതോടെ ലോക്സഭാ തെരഞ്ഞെടുപ്പില് ദേവഗൗഡ കുടുംബത്തിലെ മൂന്നാം തലമുറയിലെ രണ്ടുപേര് സ്ഥാനാര്ത്ഥികളാകുമെന്ന് ഉറപ്പായി. നേരത്തെ ദേവഗൗഡയുടെ ചെറുമകനും സംസ്ഥാന മന്ത്രിയുമായ എച്ച്.ഡി.രേവണ്ണയുടെ മകന് പ്രജ്വാള് രേവണ്ണ ഹാസനില് സ്ഥാനാര്ത്ഥിയാകുമെന്ന് പ്രഖ്യാപിച്ചിരുന്നു.
കോണ്ഗ്രസ്-ജെഡിഎസ് മുന് ധാരണ പ്രകാരം മാണ്ഡ്യ സീറ്റ് ജെഡിഎസ്സിന് നല്കാന് തീരുമാനിച്ചിരുന്നു. പിന്നീട് സുമലത മത്സരിക്കാന് എത്തിയതോടെയാണ് സീറ്റിനെ ചൊല്ലി തര്ക്കം ആരംഭിച്ചത്. കോണ്ഗ്രസ് സീറ്റു നല്കിയില്ലെങ്കില് സുമലതയെ സ്വതന്ത്രയായി മത്സരിപ്പിക്കുമെന്ന് കോണ്ഗ്രസ് പ്രാദേശിക നേതൃത്വവും സിനിമാ മേഖലയിലുള്ളവരും പ്രഖ്യാപിച്ചിട്ടുണ്ട്. സുമലത സ്വതന്ത്രയായി മത്സരിച്ചാല് പിന്തുണക്കുമെന്ന് ബിജെപി വ്യക്തമാക്കിയിട്ടുണ്ട്. കഴിഞ്ഞ ഉപതെരഞ്ഞെടുപ്പില് ബിജെപിക്ക് രണ്ടര ലക്ഷം വോട്ട് ലഭിച്ചിരുന്നു.
