കൊച്ചി: പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച കേസിലെ പ്രതി ഇമാം ഷെഫീഖ് അല് ഖാസിമിയെ പോലീസ് പിടികൂടാത്തത് നാണക്കേടാണെന്ന് ഹൈക്കോടതിയുടെ വിമര്ശനം. പീഡനത്തിനിരയായ പെണ്കുട്ടിയെ ഷെല്ട്ടര് ഹോമില് നിന്നു വിട്ടുകിട്ടണമെന്ന അപേക്ഷ ചൈല്ഡ് വെല്ഫെയര് കമ്മിറ്റി നിരസിച്ചതിനെതിരെ അമ്മ നല്കിയ ഹര്ജിയിലാണ് ഹൈക്കോടതിയുടെ വാക്കാലുള്ള നിരീക്ഷണം.
അടുത്ത മാര്ച്ച് ആറിന് കുട്ടിയെ ഹൈക്കോടതിയില് ഹാജരാക്കാനും ഹൈക്കോടതി നിര്ദേശിച്ചു. പത്താം ക്ലാസ് വിദ്യാര്ത്ഥിനിയെ ഷെഫീഖ് കാറില് കയറ്റി ആളൊഴിഞ്ഞ സ്ഥലത്തു കൊണ്ടുപോയി പീഡിപ്പിച്ചെന്നാണ് കേസ്.
കുട്ടിയെ അധികൃതര് പിന്നീട് ഷെല്ട്ടര് ഹോമിലേക്ക് മാറ്റിയിരുന്നു. പത്താം ക്ലാസ് പരീക്ഷ അടുത്ത സാഹചര്യത്തില് പെണ്കുട്ടിയെ വിട്ടുകിട്ടാന് അമ്മ നേരത്തെ ഹേബിയസ് കോര്പ്പസ് ഹര്ജി നല്കിയെങ്കിലും ഇക്കാര്യമുന്നയിച്ച് നല്കിയ അപേക്ഷ ശിശുക്ഷേമ സമിതി തീര്പ്പാക്കാന് ഹൈക്കോടതി നിര്ദേശിച്ചു.
എന്നാല്, കുട്ടിയെ വിട്ടുകിട്ടണമെന്ന ആവശ്യം സമിതി നിരസിച്ചു. തുടര്ന്നാണ് അമ്മ വീണ്ടും ഹൈക്കോടതിയെ സമീപിച്ചത്. ദിവസവും വൈകിട്ട് അഞ്ച് മുതല് ആറ് വരെയുള്ള സമയങ്ങളില് അമ്മയ്ക്കും മുത്തച്ഛനും മുത്തശ്ശിക്കും കുട്ടിയെ സന്ദര്ശിക്കാമെന്നും കുട്ടിയുടെ പഠനം ശിശുക്ഷേമ സമിതി ഉറപ്പാക്കണമെന്നും ഹൈക്കോടതി നിര്ദേശം നല്കിയിട്ടുണ്ട്.
