ന്യൂദല്ഹി: ലോകകപ്പില് പാക്കിസ്ഥാനുമായി കളി വേണ്ട എന്നായിരുന്നു കഴിഞ്ഞ രണ്ടു ദിവസങ്ങളിലെ ആവശ്യം. എന്നാല് പാക്കിസ്ഥാനുണ്ടെങ്കില് ലോകകപ്പില് നിന്നു തന്നെ പിന്മാറണം എന്ന ആവശ്യം ശക്തമായിരിക്കുന്നു കഴിഞ്ഞ മണിക്കൂറുകളില്.
പുല്വാമ ഭീകരാക്രമണത്തിന്റെ തീ കായികരംഗത്തും കത്തിപടരുകയാണ്. പാക്കിസ്ഥാനുമായി വിട്ടുവീഴ്ചയ്ക്കില്ലെന്ന വാദം ശക്തമാകുമ്പോള് കളത്തില് ഇത്തവണ ഇന്ത്യ-പാക്ക് പോരാട്ടം ചോദ്യചിഹ്നമാകുന്നു. വരാനിരിക്കുന്ന ഏകദിന ലോകകപ്പില് പാക് ടീം ഉണ്ടെങ്കില് ഇന്ത്യ കളിക്കേണ്ടെന്ന വാദം ശക്തമായിക്കഴിഞ്ഞു. പല മുന് താരങ്ങളും ഇക്കാര്യത്തില് സ്വരം കടുപ്പിച്ചു.
ഓരോ ദിവസം കഴിയുംതോറും ചൂടേറുന്ന വിഷയമാവുകയാണ് ലോകകപ്പിലെ ഇന്ത്യ പാക്ക് പോരാട്ടം. ഇതിനു മുമ്പ് പല തവണ ഇരു ടീമുകളും നേര്ക്കുനേര് വന്നിട്ടുണ്ടെങ്കിലും ഇത്തവണ കളി കാര്യമാവുമെന്നുറപ്പ്. എന്നാല് പാക്ക് ടീമുണ്ടെങ്കില് ഇന്ത്യ ലോകകപ്പ് ബഹിഷ്കരിക്കണമെന്ന ആവശ്യം പല കോണില്നിന്നും ഉയരുകയാണ്. ദിവസങ്ങള് കഴിയും തോറും വാദത്തിന്റെ ശക്തി വര്ധിക്കുന്നു. പലപ്പോഴും ചിരവൈരികളായ പാക്കിസ്ഥാനെ ഇന്ത്യ നേരിടുമ്പോള് റെക്കോഡ് കാണികളാകും കളി കാണാനെത്തുക. ലോകകപ്പ് പോലുള്ള വലിയ വേദിയാണെങ്കില് വാശിമുറുകുമെന്നുറപ്പ്. എന്നാല് ഇത്തവണ ഈ സാഹചര്യം ഒഴിവാക്കണമെന്നാണ് ക്രിക്കറ്റ് പ്രേമികളുടെ ആവശ്യം. ഇക്കാര്യത്തില് കേന്ദ്ര സര്ക്കാരിന്റെയാണ് അവസാന തീരുമാനമെന്ന് ബോര്ഡ് ഓഫ് കണ്ട്രോള് ഫോര് ക്രിക്കറ്റ് ഇന്ത്യ (ബിസിസിഐ) വ്യക്തമാക്കി കഴിഞ്ഞു.
എന്നാല് ഐസിസിയുടെ മുന് നിശ്ചയ പ്രകാരമുള്ള മത്സരഘടനയില് ഇന്ത്യയും പാക്കിസ്ഥാനും ജൂണ് പതിനാറിന് നേര്ക്കുനേര് വരും. ഈ സാഹചര്യം ഒഴിവാക്കണമെന്ന ആവശ്യമാണ് ഇപ്പോള് ഉയരുന്നത്. അടുത്തയാഴ്ച ദുബായില് തുടങ്ങുന്ന ഐസിസി യോഗത്തില് ഇക്കാര്യം ചര്ച്ചചെയ്യുമെന്ന് ഉറപ്പായിട്ടുണ്ട്. എന്നാല് മുന് നിശ്ചയിച്ച പ്രകാരമുള്ള മത്സരഘടനയില് മാറ്റം വരാന് സാധ്യത കുറവാണെന്നും കായിക രംഗത്ത് ഇത്തരം മാറ്റങ്ങള് നടത്താറില്ലെന്നും ഐസിസി ചീഫ് എക്സിക്യൂട്ടീവ് ഡേവ് റിച്ചാര്ഡ്സണ് പ്രതികരിച്ചു.
ഗ്രൂപ്പ് ഘട്ടത്തില് ഇരുടീമുകളുടെയും ഏറ്റുമുട്ടല് ഒഴിവാക്കിയാലും സെമി ഫൈനല്, ഫൈനല് പോലുള്ള മത്സരങ്ങളില് എന്ത് ചെയ്യുമെന്ന ചോദ്യവും മറുഭാഗത്ത് ഉയരുന്നു. ഫൈനലില് ഇരുടീമും നേര്ക്കുനേര് വന്നാല് ഇന്ത്യ മത്സരം ഉപേക്ഷിക്കുമോ? ഉപേക്ഷിച്ചാല് കിരീടം പാക്കിസ്ഥാന്റെ കൈയ്യിലെത്തില്ലേ? ഇത്തരം ചോദ്യങ്ങള്ക്ക് മറുപടി നല്കേണ്ടത് ബിസിസിഐയാണ്. എല്ലാത്തിനും ഉപരി ഇന്ത്യ ലോകകപ്പ് ബഹിഷ്കരിക്കാന് തയ്യാറാകുമോയെന്ന വലിയ ചോദ്യം ബിസിസിഐയെ വെട്ടിലാക്കുമെന്നുറപ്പ്. ലോകകപ്പുകളില് പാക്കിസ്ഥാനുമേല് സമ്പൂര്ണ ആധിപത്യം ഇന്ത്യക്കുണ്ട്. ഐസിസി ടൂര്ണമെന്റുകളില് ഇന്ത്യ ഇതുവരെ പാക്കിസ്ഥാനോട് അടിയറവ് പറഞ്ഞിട്ടില്ല.
-ഇന്ത്യ ശക്തമായ ടീമാണ്. ഒരു മത്സരം ഉക്ഷേിച്ചാലും ഇന്ത്യക്ക് സെമിയിലെത്താന് സാധിക്കും. സര്ക്കാര് ശക്തമായ നിലപാടെടുക്കുമ്പോള് ക്രിക്കറ്റില് പാക്കിസ്ഥാനെതിരായ മത്സരം ഇന്ത്യ ഉപേക്ഷിക്കാനും തയ്യാറാവണം- ഹര്ഭജന് സിങ്
-പുല്വാമ ഭീകരാക്രമണത്തിന്റെ പശ്ചാത്തലത്തില് ഹിമാചല്പ്രദേശ് ക്രിക്കറ്റ് അസോസിയേഷന് സ്റ്റേഡിയത്തില് സൂക്ഷിച്ചിരിക്കുന്ന പാക്കിസ്ഥാന് ക്രിക്കറ്റ് താരങ്ങളുടെ പടങ്ങള് നീക്കം ചെയ്യുന്നു- അച്ച്പിസിഎ സ്റ്റേഡിയം മാനേജര് എച്ച്എസ് മന്ഹാസ്
-പാക്കിസ്ഥാനെതിരായ ക്രിക്കറ്റ് മത്സരം ഒഴിവാക്കുകതന്നെ വേണം. ഭീകരാക്രമണം നടത്തിയ പാക്കിസ്ഥാനുമായി ഇന്ത്യ സൗഹൃദം പങ്കിടരുത്- കേന്ദ്ര നിയമമന്ത്രി രവി ശങ്കര് പ്രസാദ്
ഏകദിനം
ടീം മത്സരം ജയം തോല്വി
ഇന്ത്യ 6 6 0
പാക്കിസ്ഥാന് 6 0 6
ട്വന്റി20
ടീം മത്സരം ജയം തോല്വി
ഇന്ത്യ 5 5 0
പാക്കിസ്ഥാന് 5 0 5
ഏകദിന ലോകകപ്പില് ഇന്ത്യന് വിജയങ്ങള്
1992 – ഇന്ത്യക്ക് 43 റണ്സ് ജയം
1996 – ഇന്ത്യക്ക് 39 റണ്സ് ജയം
1999 – ഇന്ത്യക്ക് 47 റണ്സ് ജയം
2003 – ഇന്ത്യക്ക് 6 വിക്കറ്റ് ജയം
2011 – ഇന്ത്യക്ക് 29 റണ്സ് ജയം
2015 – ഇന്ത്യക്ക് 76 റണ്സ് ജയം
ട്വന്റി20 ലോകകപ്പില് ഇന്ത്യന് വിജയങ്ങള്
2007 (സമനില) സൂപ്പര് ഓവറില് ഇന്ത്യക്ക് ജയം
2007 (ഫൈനല്) ഇന്ത്യക്ക് 5 റണ്സ് ജയം
2012 ഇന്ത്യക്ക് 8 വിക്കറ്റ് ജയം
2014 ഇന്ത്യക്ക് 7 വിക്കറ്റ് ജയം
2016 ഇന്ത്യക്ക് 6 വിക്കറ്റ് ജയം
