ആലപ്പുഴ: ചെറുകിട വ്യാപാരികള്‍ക്ക് ആശ്വാസകരമാകുന്ന തരത്തില്‍ ജിഎസ്ടി രജിസ്‌ട്രേഷനുള്ള വിറ്റുവരവ് പരിധി 40 ലക്ഷമായി വര്‍ധിപ്പിച്ച ജിഎസ്ടി കൗണ്‍സില്‍ തീരുമാനം കേരളത്തില്‍ നടപ്പിലാക്കാത്തതില്‍ വ്യാപാരി വ്യവസായി ഏകോപന സമിതി പ്രതിഷേധിച്ചു. ജിഎസ്ടി കൗണ്‍സില്‍ തീരുമാനം അടിയന്തരമായി കേരളത്തിലും നടപ്പിലാക്കണമെന്ന് സംസ്ഥാന ജനറല്‍ സെക്രട്ടറി രാജു അപ്‌സര പറഞ്ഞു.
സംഘടനയുടെ നേരത്തേ മുതലുള്ള ആവശ്യം വിറ്റുവരവ് പരിധി ഒരു കോടി ആക്കണമെന്നാണ്. ഈ വിഷയം നിരവധി തവണ സംഘടന നിവേദനത്തിലൂടെയും, നേരിട്ടും കേന്ദ്ര ധനകാര്യ മന്ത്രിയുടെ ശ്രദ്ധയില്‍പ്പെടുത്തിയിട്ടുള്ളതുമാണ്. സംഘടന നടത്തിയ നിരന്തരമായ ഇടപെടല്‍ മൂലമാണ് രജിസ്‌ട്രേഷനുള്ള വിറ്റുവരവ് പരിധി 40 ലക്ഷമായി ഉയര്‍ത്താന്‍ ജിഎസ്ടി കൗണ്‍സില്‍ തയാറായത്.
വരുമാന നഷ്ടത്തിന്റെ പേര് പറഞ്ഞ് ജിഎസ്ടി രജിസ്‌ട്രേഷനുള്ള വിറ്റുവരവ് പരിധി ഇരുപതു ലക്ഷമായി നിജപ്പെടുത്തിയ കേരള സര്‍ക്കാരിന്റെ നടപടി സംസ്ഥാനത്തെ ലക്ഷക്കണക്കിന് വരുന്ന ചെറുകിട വ്യാപാരികളെ ദ്രോഹിക്കുന്നതാണ്.
കടുത്ത വ്യാപാര മാന്ദ്യം നേരിട്ടുകൊണ്ടിരിക്കുന്ന അവസരത്തില്‍ കേരളത്തിലെ വ്യാപാര-വ്യവസായ മേഖലകളില്‍ നിന്ന് പ്രളയസെസ്സ് പിരിക്കുവാനുള്ള തീരുമാനം സംസ്ഥാന സര്‍ക്കാര്‍ പുനഃപരിശോധിക്കണമെന്നും അദ്ദേഹം ആവശ്യപ്പെട്ടു.
