കോഴിക്കോട്: ഇന്ത്യയിലെ മതേതരത്വം കാത്തുസൂക്ഷിക്കുന്നത് ഹിന്ദുക്കളാണെന്ന് ചലച്ചിത്ര സംവിധായകനും സിപിഎം പോഷകസംഘടനയായ കേരള പ്രവാസിസംഘത്തിന്റെ സംസ്ഥാന പ്രസിഡന്റുമായ പി.ടി. കുഞ്ഞിമുഹമ്മദ് അഭിപ്രായപ്പെട്ടു. കോഴിക്കോട്ട് നടന്ന കേരള പ്രവാസിസംഘം പ്രതിനിധി സമ്മേളനത്തില് അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.
ഇന്ത്യയിലെ മതേതരത്വം കാത്തുസൂക്ഷിക്കുന്ന പ്രധാന ശക്തിയാരാണെന്നു ചോദിച്ചാല് ഇവിടുത്തെ ഹിന്ദുമതവിശ്വാസികളാണ് എന്നു പറയാന് എനിക്ക് ഒരു ധൈര്യക്കുറവുമില്ല. അവരാണ് മതേതരത്വം കാത്തുസൂക്ഷിക്കുന്നത്. അവര് മറ്റു വിഭാഗങ്ങളോടൊപ്പം മതേതരത്വം ഉയര്ത്തിപ്പിടിക്കുന്ന അത്ഭുതകരമായ കാഴ്ചയാണ് ഇവിടെയുള്ളത്. അതുകൊണ്ടു തന്നെ ഇന്ത്യയെ വര്ഗീയവത്കരിക്കാന് ഒരിക്കലും സാധിക്കില്ലെന്ന് താന് ഉറച്ചുവിശ്വസിക്കുന്നു. ഹിന്ദുമതവിശ്വാസികളിലുള്ള, അവരുടെ മതേതര ബോധത്തിലുള്ള ശക്തമായ വിശ്വാസം തനിക്കുണ്ട്. അതു താന് ഗുരുവായൂര് അമ്പലനടയില് നിന്ന് വരുന്നയാളായത് കൊണ്ടാണെന്നും പി.ടി. കുഞ്ഞിമുഹമ്മദ് പറഞ്ഞു.
പല ഐഎഎസ് ഉദ്യോഗസ്ഥന്മാരും പ്രവാസികള്ക്ക് എതിരാണെന്നും പി.ടി. കുഞ്ഞിമുഹമ്മദ് പറഞ്ഞു. ഇത് ഇന്നും ഇന്നലെയും തുടങ്ങിയതല്ല. പ്രവാസികള് സമ്പന്നരാണ്, ആനുകൂല്യങ്ങള് ഒന്നും വാങ്ങേണ്ടവരല്ല എന്ന ചിന്തയാണ് അവര്ക്ക്. ആ അവസ്ഥ ഇന്നും തുടരുകയാണ്. മുഖ്യമന്ത്രി പറഞ്ഞതുപോലും ഉദ്യോഗസ്ഥര് നടപ്പാക്കാന് തയാറാകുന്നില്ല. നിസ്സാരകാര്യങ്ങള് പറഞ്ഞ് ഫയലുകള് തിരിച്ചയയ്ക്കുകയാണ് ഉദ്യോഗസ്ഥര്, കുഞ്ഞിമുഹമ്മദ് പറഞ്ഞു.
