ന്യൂദല്‍ഹി: മുഖ്യമന്ത്രി പിണറായി വിജയന്റെ നിര്‍ദേശ പ്രകാരം യുവതികളെ പോലീസ് ശബരിമലയില്‍ ദര്‍ശനത്തിനെത്തിച്ച സംഭവത്തെ തുടര്‍ന്ന് കേരളത്തിലുണ്ടായ വ്യാപക സംഘര്‍ഷങ്ങളെപ്പറ്റി കേന്ദ്ര ആഭ്യന്തരമന്ത്രാലയം സംസ്ഥാന സര്‍ക്കാരിനോട് അടിയന്തര വിശദീകരണം തേടി. എത്രയും വേഗം ക്രമസമാധാന നില പുനഃസ്ഥാപിക്കണമെന്ന് സംസ്ഥാന സര്‍ക്കാരിന് കര്‍ശന നിര്‍ദേശം നല്‍കിയെന്ന് കേന്ദ്രആഭ്യന്തരമന്ത്രി രാജ്‌നാഥ് സിങ് അറിയിച്ചു.
സംസ്ഥാന സര്‍ക്കാരിനോട് കേന്ദ്രം റിപ്പോര്‍ട്ട് തേടിയിട്ടുണ്ട്. ഇതുവരെ സംസ്ഥാന സര്‍ക്കാര്‍ റിപ്പോര്‍ട്ട് സമര്‍പ്പിച്ചിട്ടില്ല. എത്രയും വേഗം പ്രശ്‌ന പരിഹാരത്തിനാണ് നിര്‍ദേശം നല്‍കിയത്, കേന്ദ്രമന്ത്രി അല്‍ഫോണ്‍സ് കണ്ണന്താനത്തിന്റെ വസതിയില്‍ നടന്ന സ്വകാര്യ ചടങ്ങില്‍ പങ്കെടുക്കാനെത്തിയ കേന്ദ്ര ആഭ്യന്തരമന്ത്രി അറിയിച്ചു.
ശനിയാഴ്ചയാണ് കേന്ദ്ര ആഭ്യന്തരമന്ത്രാലയം റിപ്പോര്‍ട്ട് തേടിയത്. നേരത്തെ സംസ്ഥാന ഗവര്‍ണ്ണര്‍ ജസ്റ്റിസ് പി. സദാശിവവും മുഖ്യമന്ത്രിയോട് റിപ്പോര്‍ട്ട് തേടിയിരുന്നു. ആര്‍എസ്എസ് വിഭാഗ് സംഘചാലക് സി. ചന്ദ്രശേഖരന്റെയും വി. മുരളീധരന്‍ എംപിയുടേയും വീടുകള്‍ക്ക് നേരേ നടന്ന അക്രമത്തെ വളരെ ഗുരുതരമായാണ് ബിജെപി കേന്ദ്ര നേതൃത്വവും കേന്ദ്രസര്‍ക്കാരും കാണുന്നത്.
കേരളത്തിലെ ആഭ്യന്തര സുരക്ഷിതത്വം അതീവ ഗുരുതരമാണെന്ന് കേന്ദ്ര ഇന്റലിജന്‍സ് ബ്യൂറോ ആഭ്യന്തരമന്ത്രാലയത്തിന് റിപ്പോര്‍ട്ട് നല്‍കിയിട്ടുണ്ട്. ഭരണഘടനാ പദവികള്‍ വഹിക്കുന്നവര്‍ വരെ പരസ്യമായി അക്രമത്തിന് ആഹ്വാനം ചെയ്യുകയാണ്. ഒരു വിഭാഗത്തിന്റെ വിശ്വാസങ്ങള്‍ക്കെതിരെ ഏകപക്ഷീയവും പ്രകോപനപരവുമായ നടപടികളാണ് സര്‍ക്കാരില്‍ നിന്ന് തുടര്‍ച്ചയായി ഉണ്ടാകുന്നതെന്നും റിപ്പോര്‍ട്ടില്‍ വ്യക്തമാക്കുന്നു.
