കൊച്ചി: ശബരിമല വിഷയത്തില് തന്ത്രി കുടുംബത്തിന് എതിരെ ഇടതു സര്ക്കാരിന്റെ നീക്കം. കോടതി വിധി പാലിക്കാത്ത തന്ത്രി രാജിവയ്ക്കണമെന്ന് കഴിഞ്ഞ ദിവസം മുഖ്യമന്ത്രി ആവശ്യപ്പെട്ടതിനു പിന്നാലെ ഇന്നലെ മന്ത്രി വി.എസ്. സുനില് കുമാറും തന്ത്രിക്കെതിരെ ഇറങ്ങി. തന്ത്രിയെ ഉടന് മാറ്റണമെന്നാണ് സുനില് കുമാറിന്റെ ആവശ്യം.
ശബരിമല ക്ഷേത്രത്തിന്റെ താന്ത്രികാവകാശം താഴമണ് മഠത്തിനാണ്. ഇത് പരമ്പരാഗതമായി തന്നെ കൈവന്നതാണ്. ഏതെങ്കിലും സര്ക്കാരോ മന്ത്രിയോ ദേവസ്വം ബോര്ഡോ നല്കിയതുമല്ല. ഇത്അറിയാത്തതു കൊണ്ടല്ല മുഖ്യമന്ത്രിയും മന്ത്രിയും തന്ത്രിയെ നീക്കണമെന്ന് ആവശ്യപ്പെടുന്നത്. അങ്ങനെ ചെയ്യാന് ബോര്ഡിനോ സര്ക്കാരിേനാ ആവില്ലെന്ന് ഇവര്ക്കറിയാം.
തങ്ങളുടെ ഹിതത്തിനനുസരിച്ച് തുള്ളാത്ത തന്ത്രിയെ ഭീഷണിപ്പെടുത്തി വരുതിക്ക് നിര്ത്താനുള്ള നീക്കമാണിതിനു പിന്നിലെന്നാണ് സൂചന. ആചാരലംഘനം നടന്നാല് ശുദ്ധികലശം നടത്തി ക്ഷേത്ര സങ്കേതം ശുദ്ധീകരിക്കേണ്ടത് തന്ത്രിയാണ്.
കഴിഞ്ഞ ദിവസം രണ്ട് ആക്ടിവിസ്റ്റുകളായ യുവതികളെ സന്നിധാനത്തേക്ക് ഒളിച്ചുകടത്തി സര്ക്കാര് ആചാരലംഘനം നടത്തിയിരുന്നു. ഇതേത്തുടര്ന്ന് നട അടച്ചിട്ട് ശുദ്ധികലശം നടത്തിയതാണ് തന്ത്രിക്കെതിരായ നീക്കത്തിന് കാരണം. മുന്പ് പന്തളം രാജകുടുംബത്തിന് എതിരെയും സര്ക്കാരും മന്ത്രിമാരും തിരിയുകയും കുടുംബത്തെ അടച്ചാക്ഷേപിക്കുകയും ചെയ്തിരുന്നു. രാജകുടുംബത്തിന് ശബരിമലയില് അവകാശമേയില്ലെന്നാണ് അന്ന് പറഞ്ഞത്. വാദം പൊളിഞ്ഞതോടെ പന്തളം രാജകുടുംബത്തിന് എതിരായ നീക്കം ഉപേക്ഷിച്ചു.
