കൊല്ലം: ശബരിമല യുവതീ പ്രവേശനത്തെ തുടര്ന്ന് തന്ത്രി നടത്തിയ ശുദ്ധിക്രിയകളെ വിമര്ശിച്ചുള്ള മുഖ്യമന്ത്രിയുടെ പ്രസ്താവന അംഗീകരിക്കാനാവില്ലെന്ന് തന്ത്രവിദ്യാപീഠം സെക്രട്ടറി എന്. ബാലമുരളി. ക്ഷേത്രാചാരങ്ങളില് മുഖ്യമന്ത്രിക്കുള്ള അജ്ഞത വ്യക്തമാക്കുന്നതാണ് ഇത്തരം പ്രസ്താവനകളെന്നും അദ്ദേഹം വ്യക്തമാക്കി.
ഓരോ ക്ഷേത്രത്തിനും സവിശേഷമായ ആചാരപദ്ധതികള് ആചാര്യന്മാര് നിര്ദ്ദേശിച്ചിട്ടുണ്ട്. ആചാരലംഘനം നടന്നാല് തന്ത്രശാസ്ത്രപ്രകാരമുള്ള പരിഹാരക്രിയകള് ചെയ്യാന് ക്ഷേത്ര തന്ത്രിക്ക് പ്രതിബദ്ധതയുണ്ട്. തന്ത്രിക്ക് ക്ഷേത്രമടയ്ക്കാന് എന്താണധികാരം എന്നു ചോദിക്കുന്നത് തികച്ചും ബാലിശമാണ്. ഇക്കണക്കിന് ദീപാരാധനയ്ക്ക് നടയടയ്ക്കുന്നതും നിയമലംഘനമായി വ്യാഖ്യാനിക്കുമല്ലോയെന്നും അദ്ദേഹം ചോദിച്ചു.
പരശുരാമ പ്രതിഷ്ഠിതമായ ശബരിമല ക്ഷേത്രത്തിലെ ആചാരപരിപാലനത്തിനും സംരക്ഷണത്തിനുമുള്ള ചുമതല താഴമണ് കുടുംബത്തില് നിക്ഷിപ്തമാണ്. തന്ത്രശാസ്ത്രം അനുശാസിക്കുന്ന കര്മ്മങ്ങള് മാത്രമാണ് തന്ത്രി ശബരിമലയില് അനുഷ്ഠിച്ചത്. അത് കോടതിയലക്ഷ്യമാകില്ലെന്നും അദ്ദേഹം വ്യക്തമാക്കി.
