കോഴിക്കോട്: ജാതിരഹിതമായ സമൂഹത്തിന് നാന്ദികുറിക്കുക എന്ന ലക്ഷ്യത്തോടെ കാശ്യപാശ്രമം പുതുവത്സരത്തില് ചൂഡാകര്മവും കര്ണവേധവും ഉപനയനവും വേദാരംഭവും നടത്തി പ്രാചീന ഗുരുകുലരീതിക്ക് തുടക്കം കുറിച്ചു. കേരളത്തില് ആദ്യമായാണ് പൂര്ണമായും മലയാളികളെ പ്രവേശിപ്പിച്ചുള്ള ഗുരുകുലം പ്രവര്ത്തനം ആരംഭിക്കുന്നത്.
തുടക്കത്തില് 14 കുട്ടികളാണ് പാരമ്പര്യ രീതിയിലുള്ള യജ്ഞച്ചടങ്ങുകളോടെ ഋഗ്വേദവും സംസ്കൃത വ്യാകരണവും ദര്ശനാദി ശാസ്ത്രങ്ങളും പഠിക്കുന്നത്. കാശ്യപാശ്രമത്തിന്റെ ഒറ്റത്തെങ്ങിലുള്ള ഗുരുകുലത്തിലാണ് പഠനം. ഗോപരിരക്ഷണം, കൃഷി എന്നിവയ്ക്കും പഠനത്തില് പ്രാമുഖ്യമുണ്ട്. കാശ്യപാശ്രമം കുലപതി ആചാര്യശ്രീ രാജേഷിന്റെ നേതൃത്വത്തിലായിരുന്നു ചടങ്ങുകള് നടന്നത്. വേദാദി ശാസ്ത്രങ്ങളുടെ ചിട്ടയായ പഠനത്തിലൂടെ മാത്രമേ ഭാവികാലത്ത് സനാതന സംസ്കൃതി സംരക്ഷിക്കാന് കഴിയൂ എന്ന് അദ്ദേഹം അഭിപ്രായപ്പെട്ടു. വേദപാഠി വിദ്വാന് ഉദയ് ഭട്ട്, സംസ്കൃത വൈയാകരണനായ വിദ്വാന് വിജയ് കുമാര് എന്നിവരും ചടങ്ങുകളില് പങ്കെടുത്തു.
