മന്നം ജയന്തി ആഘോഷത്തോട് അനുബന്ധിച്ച് പെരുന്ന മന്നം നഗറില്‍ ചേര്‍ന്ന അഖില കേരള നായര്‍ പ്രതിനിധി സമ്മേളനത്തില്‍ എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍ വിശദീകരണ പ്രസംഗം നടത്തുന്നു
ചങ്ങനാശേരി: സര്‍ക്കാര്‍ കൈയിലുണ്ടെന്ന് കരുതി വിശ്വാസം തകര്‍ക്കാന്‍ ഏതു മുഖ്യമന്ത്രി വന്നാലും നടക്കില്ലെന്ന് എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍. സമുദായചാര്യന്‍ മന്നത്ത് പത്മനാഭന്റെ 142-ാം ജയന്തി ആഘോഷത്തോട് അനുബന്ധിച്ച് പെരുന്ന മന്നം നഗറില്‍ ചേര്‍ന്ന അഖില കേരള നായര്‍ പ്രതിനിധി സമ്മേളനത്തില്‍ പ്രസംഗിക്കുകയായിരുന്നു അദ്ദേഹം.
മുഖ്യമന്ത്രിയുടെ വിമര്‍ശനങ്ങള്‍ക്ക് എണ്ണിയെണ്ണിയായിരുന്നു ജനറല്‍ സെക്രട്ടറിയുടെ മറുപടി. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍, സിപിഐ സംസ്ഥാന സെക്രട്ടറി കാനം രാജേന്ദ്രന്‍, എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍, ആര്‍. ബാലകൃഷ്ണപിള്ള എന്നിവരെയും പ്രസംഗത്തില്‍ കടന്നാക്രമിച്ചു.
ജാതിയുടെയും മതത്തിന്റെയും പേരില്‍ വിഭാഗീയത സൃഷ്ടിക്കുന്ന വനിതാ മതിലോടെ ദൈവത്തിന്റെ നാടായ കേരളം ചെകുത്താന്റെ നാടാകും. കണ്ണുരുട്ടി കാണിക്കേണ്ടെന്നാണ് പിണറായി പറഞ്ഞത്. അതു തന്നെയാണ് ഞങ്ങള്‍ക്കും പറയാനുള്ളത്. ദിവസവും മലക്കം മറിയുന്ന സര്‍ക്കാരിനാണോ എന്‍എസ്എസിനാണോ ഇരട്ടത്താപ്പെന്ന് മുഖ്യമന്ത്രി വ്യക്തമാക്കണം. മതിലിന്റെയും ശബരിമലയുടെയും വിഷയത്തില്‍ സര്‍ക്കാര്‍ എത്ര തവണ മലക്കം മറിഞ്ഞു. മതില്‍ സ്ത്രീ സമത്വത്തിനും സ്ത്രീ സുരക്ഷയ്‌ക്കും വേണ്ടിയാണെന്നാണ് ആദ്യം പറഞ്ഞത്. ശബരിമലയുമായി ബന്ധപ്പെട്ടാണ് വനിതാ മതിലെന്ന് ഇപ്പോള്‍ വ്യക്തമായി. തോക്കിനും വെടിയുണ്ടകള്‍ക്കും മുന്നിലൂടെ നടന്നെന്ന് അവകാശപ്പെടുന്ന മുഖ്യമന്ത്രിക്ക് നിരത്തിലിറങ്ങാന്‍ എത്ര പോലീസിന്റെ അകമ്പടി വേണം? എന്‍എസ്എസ് ജനറല്‍ സെക്രട്ടറിക്ക് അതിന്റെ ആവശ്യമില്ല. ഒരു സമുദായ നേതാവ് കേന്ദ്ര പോലീസിന്റെ അകമ്പടിയോടെയാണ് നടക്കുന്നതെന്നും അദ്ദേഹം പരിഹസിച്ചു.
മന്നത്തിന്റെ പാതയിലല്ല എന്‍എസ്എസ് എന്ന് പറയാന്‍ മുഖ്യമന്ത്രിക്ക് എന്തവകാശം. ആചാരങ്ങള്‍ സംരക്ഷിക്കാന്‍ മന്നത്തിന്റെ സന്തതികള്‍ക്കല്ലാതെ ആര്‍ക്കാണ് അവകാശം. സിപിഎം പറയുന്നത് എന്താണെന്ന് ആര്‍ക്കും മനസിലാകുന്നില്ല. കഴിഞ്ഞ ദിവസത്തെ മുഖ്യമന്ത്രിയുടെ വാര്‍ത്താസമ്മേളനത്തിലെ വാചകം ഉദ്ധരിച്ച് അദ്ദേഹം കുറ്റപ്പെടുത്തി.
തങ്ങള്‍ നിരീശ്വരവാദികളാണ്, ഈശ്വര വിശ്വാസം തകര്‍ക്കും എന്നു നേരെ പറയാന്‍ അവര്‍ തയാറാകണം. ആചാരവും അനാചാരവും ദുരാചാരവും തിരിച്ചറിയാത്തവരാണ് നവോത്ഥാനത്തെക്കുറിച്ച് പറയുന്നത്. അവര്‍ എന്‍എസ്എസിനെ നവോത്ഥാനം പഠിപ്പിക്കാന്‍ വരണ്ട. മന്നവും ആര്‍. ശങ്കറുമാണ് ദേവസ്വം ബോര്‍ഡിനെ ആദ്യം നയിച്ചത്. അന്നും ഈ ആചാരം ഉണ്ടായിരുന്നു.
സമദൂരത്തെക്കുറിച്ച് പറയാന്‍ കോടിയേരിക്കും കാനത്തിനും പിള്ളയ്‌ക്കും എന്ത് യോഗ്യതയാണുള്ളത്. സ്വന്തം ആവശ്യങ്ങള്‍ക്ക് സൗകര്യപൂര്‍വം ഇവിടെ വന്നുപോയവരാണവര്‍. എന്‍എസ്എസിന്റെ ഡയറക്ടര്‍ ബോര്‍ഡില്‍ ഇരുന്ന് മറ്റേ ദൂരത്തേക്ക് പോയത് ഞാനാണോ പിള്ളയാണോ എന്നും സുകുമാരന്‍ നായര്‍ ചോദിച്ചു. അംഗങ്ങള്‍ക്ക് രാഷ്ടീയമാകാം. എന്നാല്‍ സംഘടനയ്‌ക്കുള്ളില്‍ രാഷ്ടീയം കലര്‍ത്താന്‍ നോക്കേണ്ട.
സമ്മേളനത്തില്‍ പ്രസിഡന്റ് അഡ്വ. പി.എന്‍ .നരേന്ദ്രനാഥന്‍ നായര്‍ അധ്യക്ഷനായി. ട്രഷറര്‍ ഡോ. എം. ശശികുമാര്‍, രജിസ്ട്രാര്‍ പി.എന്‍. സുരേഷ്, താലൂക്ക് യൂണിയന്‍ പ്രസിഡന്റുമാര്‍, ഡയറക്ടര്‍ ബോര്‍ഡ് അംഗങ്ങള്‍ എന്നിവര്‍ വേദിയില്‍ ഉണ്ടായിരുന്നു.
