മലപ്പുറം: മുത്തലാഖ് ബില് ലോക്സഭയില് അവതരിപ്പിക്കുന്ന സമയത്ത് പി.കെ.കുഞ്ഞാലിക്കുട്ടി എംപി ഹാജരാകാത്തതിനെ സംബന്ധിച്ച് പാര്ട്ടി ചര്ച്ച ചെയ്യുമെന്ന് മുസ്ലിം ലീഗ് രാഷ്ട്രീയകാര്യ സമിതി ചെയര്മാന് പാണക്കാട് ഹൈദരലി ശിഹാബ് തങ്ങള്. ഇതിനായി പാര്ട്ടി ഉടന് യോഗം വിളിക്കുമെന്നും ഹൈദരലി തങ്ങള് പറഞ്ഞു.
അതേസമയം രാജ്യസഭയില് തിങ്കളാഴ്ച മുത്തലാഖ് ബില് പരിഗണിക്കുമ്പോള് അതിനെതിരെ വോട്ട് ചെയ്യാനായി ലീഗ് അംഗങ്ങള്ക്ക് നിര്ദ്ദേശം നല്കിയതായും ഹൈദരലി ശിഹാബ് തങ്ങള് പറഞ്ഞു. രാജ്യസഭയില് ബില്ല് പാസാകിലെന്നാണ് പ്രതീക്ഷയെന്നും അങ്ങനെയെങ്കില് ആക്ഷേപങ്ങള് അവസാനിക്കുമെന്നും അദ്ദേഹം വ്യക്തമാക്കി.
വോട്ടെടുപ്പില് പങ്കെടുക്കാതെ വിട്ടുനിന്നത് ചന്ദ്രികയുടെ ഗവേണിംഗ് ബോഡിയില് പങ്കെടുക്കാനാണെന്നും വിവാഹത്തില് പങ്കെടുത്തത് കൊണ്ടല്ലെന്നും കുഞ്ഞാലിക്കുട്ടി വിശദീകരിച്ചിരുന്നു. വോട്ടെടുപ്പ് ഉണ്ടാകുമെന്നറിഞ്ഞെങ്കില് സഭയില് എത്തുമായിരുന്നു. ടൈം മാനേജ്മെന്റില് പ്രശ്നങ്ങള് വരുന്നുണ്ട്. കേന്ദ്ര, കേരള ചുമതലകള് ഒന്നിച്ചു കൊണ്ടുപോകല് പ്രശ്നമുണ്ടാക്കുന്നുവെന്നും കുഞ്ഞാലിക്കുട്ടി കൂട്ടിച്ചേര്ത്തു.
