കൊല്ലം: വനിതാമതിലിന്റെ പ്രചരണത്തിന് കലാജാഥയുമായെത്തിയ സിപിഎംകാര്‍ വനിതകള്‍ക്കുനേരെ കൊല്ലത്ത് ആക്രമണം അഴിച്ചുവിട്ടു. വനിതകളുടെ സംഗമവേദിയിലെത്തിയ സിപിഎം ഡിവൈഎഫ്‌ഐക്കാര്‍ അവരെ കയ്യേറ്റം ചെയ്തു. കേട്ടാലറയ്‌ക്കുന്ന അസഭ്യവര്‍ഷമാണ് വനിതകള്‍ക്കുനേരെ നടത്തിയത്.
യുഡിഎഫ് കൊല്ലത്ത് സംഘടിപ്പിച്ച വനിതാ സംഗമവേദിയിലാണ് വനിതാമതിലുകാര്‍ അതിക്രമമഴിച്ചുവിട്ടത്. സ്ഥലത്തുണ്ടായിരുന്ന പോലീസ് അക്രമികള്‍ക്ക് അനുകൂല നിലപാടാണ് സ്വീകരിച്ചത്. സിപിഎം നേതൃത്വത്തില്‍ വനിതാ മതിലിന്റെ പ്രചരണാര്‍ഥം നടത്തിയ കലാജാഥ കൊല്ലം ചിന്നക്കടയിലെത്തിയപ്പോള്‍ വനിതാസംഗമവേദിക്കരികെ തിരുവാതിര നടത്തണമെന്ന് വനിതാമതിലുകാര്‍ വാശിപിടിച്ചു. ഇതിനെ സംഗമക്കാര്‍ ചോദ്യം ചെയ്തതാണ് മതിലുകാരെ പ്രകോപിപ്പിച്ചത്. തുടര്‍ന്ന് സ്ത്രീസമത്വവും നവോത്ഥാനവും ഒക്കെ മാറ്റിവച്ച് അസഭ്യവര്‍ഷവും കയ്യേറ്റവും പുറത്തെടുക്കുകയായിരുന്നെന്ന് കാണികള്‍ പറയുന്നു.
വനിതാ സംഗമത്തിനെത്തിയ യുഡിഎഫ് പ്രവര്‍ത്തകരെ സിപിഎം നേതൃത്വത്തില്‍ അസഭ്യം പറയുകയും കയേറ്റത്തിന് ശ്രമിക്കുകയും ചെയ്തതില്‍ പ്രതിഷേധിച്ച് ഇന്ന് കൊല്ലം ജില്ലയില്‍ പ്രതിഷേധപ്രകടനം നടത്തുമെന്ന് ഡിസിസി പ്രസിഡന്റ് ബിന്ദു കൃഷ്ണ പറഞ്ഞു.
