ന്യൂദല്ഹി: ഡെപ്യൂട്ടേഷന് നീട്ടിനല്കണമെന്ന സായുധസേനാ ഡിഐജി ഷെഫീന് അഹമ്മദിന്റെ അപേക്ഷ കേന്ദ്രസര്ക്കാര് വീണ്ടും തള്ളി. ഇക്കാര്യം ആവശ്യപ്പെട്ട് മുഖ്യമന്ത്രി നല്കിയ കത്തും പരിഗണിക്കില്ല. ഷെഫീന് അഹമ്മദിനെ ഉടന് ഒഡീഷയിലേക്ക് മടക്കാന് ആവശ്യപ്പെട്ട് കേന്ദ്ര ആഭ്യന്തരമന്ത്രാലയം കേരള ചീഫ് സെക്രട്ടറിക്ക് കത്ത് നല്കും. ഷെഫീനെതിരായ ഇന്റലിജന്സ് റിപ്പോര്ട്ടും ശബരിമലയിലെ പോലീസ് നടപടികളിലെ അനധികൃത ഇടപെടലും കണക്കിലെടുത്താണ് കേന്ദ്ര നടപടി.
ഒഡീഷ കേഡറിലെ 2003 ബാച്ച് ഐപിഎസ് ഉദ്യോഗസ്ഥനായ ഷെഫീന് അഞ്ചു വര്ഷമായി കേരളത്തില് ഡെപ്യൂട്ടേഷനിലാണ്. സപ്തംബര് പത്തിന് ഡെപ്യൂട്ടേഷന് കാലാവധി അവസാനിച്ചിട്ടും മൂന്ന് മാസത്തോളമായി ഇയാള് കേരളത്തില് പ്രവര്ത്തിക്കുകയാണ്. ഈ മാസങ്ങളിലെ ശമ്പളം അക്കൗണ്ടന്റ് തടഞ്ഞിട്ടുണ്ട്. ഷെഫീനെതിരെ കേന്ദ്രആഭ്യന്തരമന്ത്രാലയം അന്വേഷണത്തിന് തയാറെടുക്കുകയാണ്.
സര്വീസ് ചട്ടങ്ങളുടെ ലംഘനം ഷെഫിന്റെ ഭാഗത്തുനിന്നുണ്ടായിട്ടുണ്ടെന്നാണ് കേന്ദ്ര ആഭ്യന്തരമന്ത്രാലയത്തിന്റെ വിലയിരുത്തല്. കേഡറില് തിരികെ എത്തിയാല് കര്ശന നടപടിയെടുക്കാന് ഒഡീഷ സര്ക്കാരിനോടും കേന്ദ്ര ആഭ്യന്തരമന്ത്രാലയം നിര്ദ്ദേശം നല്കും. അവിടെയും ഷെഫിന്റെ പ്രവര്ത്തനങ്ങള് നിരീക്ഷണത്തിലായിരിക്കുമെന്ന് ഇന്റലിജന്സ് കേന്ദ്രങ്ങള് വ്യക്തമാക്കി.
ഡെപ്യൂട്ടേഷന് കാലാവധി കഴിഞ്ഞും ഷെഫീന് കേരളത്തില് തുടരുന്നത് ‘ജന്മഭൂമി’യാണ് ആദ്യം റിപ്പോര്ട്ട് ചെയ്തത്. വിവാദ സംഘടനകളുമായുള്ള ബന്ധവും ശബരിമലയിലെ ഇടപെടലും തുടര്ച്ചയായ ദിവസങ്ങളില് ജന്മഭൂമി വാര്ത്തയാക്കിയിരുന്നു. എന്നാല് വാര്ത്ത പിന്വലിച്ച് മാപ്പ് പറയണമെന്നും ഒരു കോടി രൂപ നഷ്ടപരിഹാരം നല്കണമെന്നും ആവശ്യപ്പെട്ട് വക്കീല് നോട്ടീസയച്ച് ഭീഷണിപ്പെടുത്തുകയാണ് ഷെഫീന് ചെയ്തത്. ജന്മഭൂമി വാര്ത്ത ശരിവയ്ക്കുന്നതാണ് കേന്ദ്ര ആഭ്യന്തര മന്ത്രാലയത്തിന്റെ നടപടി.
ഷെഫീന് ഡെപ്യൂട്ടേഷന് നീട്ടാന് നല്കിയ അപേക്ഷ നേരത്തെയും നിരസിക്കപ്പെട്ടിരുന്നു. തുടര്ന്ന് മുഖ്യമന്ത്രി പിണറായി വിജയനും സംസ്ഥാന പോലീസ് മേധാവി ലോക്നാഥ് ബെഹ്റയും വിവാദ ഉദ്യോഗസ്ഥന് വേണ്ടി രംഗത്തിറങ്ങി. കേന്ദ്ര ആഭ്യന്തരമന്ത്രി രാജ്നാഥ് സിങ്ങുമായി പിണറായി ഫോണില് സംസാരിക്കുകയും കത്ത് നല്കുകയും ചെയ്തു. സംസ്ഥാന സര്ക്കാര് നിരന്തര സമ്മര്ദം ചെലുത്തിവരുന്നതിനിടെയാണ് കേന്ദ്രം കര്ശന നിലപാട് സ്വീകരിച്ചത്. കേരള കേഡറിലേക്ക് മാറ്റാനുള്ള നീക്കവും പരാജയപ്പെട്ടു. ഇതോടെ ഷെഫീന് ഉടന് ഒഡീഷയിലേക്ക് മടങ്ങേണ്ടി വരും. നേരത്തെയും കേന്ദ്രം ഇക്കാര്യം ആവശ്യപ്പെട്ടിരുന്നുവെങ്കിലും ഇയാളെ പിണറായിയും ബെഹ്റയും സംരക്ഷിക്കുകയായിരുന്നു. തിരുവനന്തപുരം സിറ്റി പോലീസ് കമ്മീഷണറാക്കാനായിരുന്നു സര്ക്കാരിന്റെ നീക്കം.
ശബരിമലയില് ഭക്തര്ക്കെതിരായ പോലീസ് നടപടികളെ പിന്നില്നിന്ന് നിയന്ത്രിച്ചതും കരുതല് തടങ്കലിലെടുത്ത ബിജെപി നേതാവ് കെ. സുരേന്ദ്രനെതിരെ ജാമ്യമില്ലാത്ത വകുപ്പ് ചുമത്തി റിമാന്ഡ് ചെയ്യിപ്പിച്ചതും ഷെഫീന്റെ ഇടപെടലിനെ തുടര്ന്നാണെന്ന് ആരോപണമുയര്ന്നിരുന്നു.
