ന്യൂദല്‍ഹി: ശബരിമലയിലെ യുവതീപ്രവേശന വിഷയത്തില്‍ സംസ്ഥാന സര്‍ക്കാര്‍ വീണ്ടും സുപ്രീംകോടതിയിലേക്ക്. വിധി നടപ്പാക്കാന്‍ ചില സംഘടനകള്‍ തടസം സൃഷ്ടിക്കുന്നെന്ന് കോടതിയോട് പറയാനാണ് പദ്ധതി.
കുഴപ്പങ്ങളുടെ ഉത്തരവാദിത്തം മുഴുവന്‍ ബിജെപിയിലും മറ്റു പരിവാര്‍ സംഘടനകളിലും കെട്ടിവയ്‌ക്കാനാണ് സര്‍ക്കാരിന്റെ ഗൂഢനീക്കം. ശബരിമലയിലെ പോലീസ് ഉദേ്യാഗസ്ഥരുടെ അഴിഞ്ഞാട്ടം മൂലം ജഡ്ജിമാര്‍ക്കു പോലും ബുദ്ധിമുട്ടുണ്ടാകുന്ന അവസ്ഥയാണ്. അത് മറച്ചുവച്ച് പോലീസ് ഉദ്യോഗസ്ഥര്‍ വലിയ ക്ലേശം അനുഭവിക്കുന്നെന്ന് കോടതിയെ ധരിപ്പിക്കാനാണ് നീക്കം.
ശരണംവിളിയും മറ്റും തടയരുതെന്ന ഉത്തരവ് ലംഘിച്ചാണ് പോലീസ് ഉദ്യോഗസ്ഥര്‍ നാമജപം നടത്തുന്നവരെ തടയുന്നത്. ഇത് മറച്ചുവയ്‌ക്കുക ലക്ഷ്യം. ചീഫ് സെക്രട്ടറിയാകും കോടതിയെ സമീപിക്കുക. ഇക്കാര്യങ്ങള്‍ ചര്‍ച്ച ചെയ്യാന്‍ സര്‍ക്കാര്‍ സ്റ്റാന്‍ഡിങ് കോണ്‍സല്‍ ജി. പ്രകാശ് മുതിര്‍ന്ന അഭിഭാഷകരുമായി കൂടിക്കാഴ്ച നടത്തി. ഉത്തരവ് നടപ്പാക്കാന്‍ മാര്‍ഗനിര്‍ദേശം തേടി പോലീസ് സുപ്രീംകോടതിയെ സമീപിക്കുമെന്നാണ് ആദ്യം പറഞ്ഞിരുന്നത്. എന്നാല്‍, പോലീസ് നേരിട്ട് കോടതിയെ സമീപിക്കില്ലെന്നാണ് ഇപ്പോള്‍ പറയുന്നത്.
